Kýrchatovtyq oqýshy Semeı polıgonyna týrıster tartpaqshy
ÓSKEMEN. QazAqparat - Kýrchatov qalasynyń 10 synyp oqýshysy Semeı polıgonyna týrıstik saıahat uıymdastyrýdy usyndy, dep habarlaıdy QazAqparat tilshisi.
Óskemendegi Qazaqstan-Amerıkalyq erkin ýnıversıtettiń uıymdastyrýymen «Jas kásipker» atty bıznes-jobalardyń óńirlik saıysy ótti. Osy konkýrsta Kýrchatov qalasynyń oqýshysy Semeı polıgonyna saıahat uıymdastyrý jobasyn usyndy. Saıysqa tek kolledj shákirtteri men mektep oqýshylary ǵana qatysty.
«Semeı polıgony - ekologııalyq týrızm úshin taptyrmaıtyn nysan. Polıgon degende oıyńyzǵa birden radıatsııa keletinin bilem. Biraq biz uıymdastyratyn saıahattyń bári Ulttyq ıadrolyq ortalyq mamandarynyń baqylaýymen uıymdastyrylady. 5-6 adamdyq shaǵyn top áýeli Semeıdegi Polıgon mýzeıinde bolyp, 40 jyl boıy júrgizilgen synaqtardyń zardabymen tanysady. Odan keıin arnaıy kıim kıip, polıgon aýmaǵyna ótedi. Atalmysh aýmaqta bir delegatsııa 1-1,5 saǵat kóleminde ǵana aralaı alady. Bul ýaqytta olar dozımetrıstiń baqylaýymen dúmpýden qalǵan oryndardy syrttaı tamashalap, Máskeý metropolıteniniń kóshirmesimen tanysady. Beıbit atom óndirisindegi teńdessiz joba - «Tokamak» stansasy da saıahat nysandarynyń tizimine engen» - deıdi joba avtory Ekaterına Lokshtanova.
Saıahat quny jergilikti týrıster úshin 2,5 myń teńgeden bastalsa, sheteldik týrıster úshin 80 myń teńge bolmaq.
«Sheteldik meımandar jaıly qonaqúıde jatyp, jaıly kólikpen júrýdi talap etetini belgili. Bul somanyń ishine týrıstik kompanııamen jasalǵan kelisimshart quny da kiredi. Biz týrıstik kompanııalar men Ulttyq ıadrolyq ortalyqtyń arasynda úılestirýshi qyzmetin atqaratyn bolamyz. Al otandyq týrısterdi jekeleı qabyldaı beremiz. Men bul jobaǵa jeke kásipker retinde qatysa almaımyn. Óıtkeni atalmysh aýmaq áli de bolsa strategııalyq nysan sanalady. Sondyqtan árbir saıahat quzyrly oryndardyń qadaǵalaýymen júzege asady. Japonııadaǵy Nevada qalasynyń ornyna da týrıster osyndaı tásilmen baryp júr» - deıdi Ekaterına Lokshtanova.
Ekinshi jyl qatarynan ótkizilgen konkýrsta úzdik dep tanylǵan jobany «Damý» kásipkerlikti qoldaý qory qarjylandyrmaq.
«Aldyn ala irikteýge oblystyń barlyq aýdandarynan 32 joba túsken. Biz sonyń 10-yn ǵana iriktep aldyq. Jeńimpaz jobalardyń ózekti degenderin «Damý qory» qarjylandyrady. Al bizdiń ýnıversıtet joba jeńimpazdaryn «Bıznes» kafedrasynyń mamandyqtaryna jeńildikpen shaqyryp otyr. Birinshi oryn alǵan úmitkerge 15 paıyzdyq jeńildik beremiz», - deıdi «Bıznes» kafedrasynyń aǵa oqytýshysy Olga Bogorodskaıa.
Saıys qorytyndysy boıynsha І dárejeli dıplommen «Istok» jekemenshik jalpy bilim berý mektebiniń 11-synyp oqýshysy Dmıtrıı Podoınıkov marapattaldy. Dmıtrıı qazylar alqasyna «Shyny saýyttaǵy raýshan gúli» jobasyn usynǵan bolatyn.
«Polıgonǵa týrıstik ekskýrsııalar» jobasyn usynǵan Kýrchatov qalasynyń №3 orta mektebiniń 10 synyp oqýshysy Ekaterına Lokshtanova ІІ dárejeli dıplomǵa ıe boldy.
Úshinshi dárejeli dıplom Rymbek Baıseıitov atyndaǵy Semeı qarjy-ekonomıkalyq kolledjiniń 2 kýrs stýdentteri Gúlaıym Myrzabekova, Gúlmıra Sovetova, Altyngúl Toqaeva úshtigine buıyrdy.
