Kýrchatovtaǵy órt: bir adam qaza tapty
ÓSKEMEN. QazAqparat - Kýrchatov qalasynda túngi saǵat 3-te 5 qabatty turǵyn úıdiń sońǵy qabatyndaǵy páterden órt shyqqan. Órt saldarynan balkonnyń esigi, jıhazdar men tósek-oryn jabdyqtary janyp ketken. Qaıǵyly oqıǵa týraly qarama-qarsy bettegi kórshi úıdiń turǵyndary málim etti, dep habarlaıdy QazAqparat tilshisi.
TJD málimetinshe, órt sóndirýshiler tynys alý quraldarynyń kómegimen janyp jatqan páterge kirgen. Olar jatyn bólmeden es-tússiz jatqan 1959 jylǵy er adamdy tapqan.
Órt sóndirýshiler er adamdy órtke oranǵan páterden alyp shyǵyp, alǵashqy kómek kórsetken. Keıin ony jedel járdem alyp ketken.
Órt sóndirý barysynda olar taǵy bir adamdy tapqan. Ókinishke qaraı, ony qutqarý múmkin bolmady. Páterden 1976 jylǵy áıeldiń janyp ketken denesi tabylǵan.
Sonymen qatar, turǵyn úıden qaýipsizdik maqsatynda 12 adam, sonyń ishinde 3 bala evakýatsııalandy. Órt bir saǵattan keıin tolyqtaı sóndirildi. 2 tehnıka men 8 adam jumyldyryldy. Órt temeki shegý kezinde otty abaısyz qoldaný saldarynan shyǵýy múmkin.
TJD-da atap ótkendeı, adamdardyń kóbi osy sebepten zardap shegip, qaza taýyp jatyr. Qazirgi tańda 500 órt oqıǵasy tirkelgen.
