Kýrchatovta júrgizýshi kýáligi joq mas áıel jol-kólik oqıǵasyna sebep boldy
ASTANA. KAZINFORM — Kýrchatov qalasynda júrgizýshi kýáligi joq adamnyń qatysýymen jol-kólik oqıǵasy tirkeldi, dep habarlaıdy Abaı oblysy PD baspasóz qyzmeti.
Aldyn ala málimetterge sáıkes, áıel adam alkogoldik masań kúıde bola otyryp, jubaıyna tıesili avtokólikti basqarǵan jáne turaqta turǵan kólikterdi soqqan. Oqıǵadan keıin qatysýshylar medıtsınalyq mekemege jetkizilip, saraptamadan ótti.
— Saraptama qorytyndysyna sáıkes, áıel ortasha dárejede mas kúıde bolǵan. Sonymen qatar, kólik ıesi — quqyq buzýshynyń jubaıy — da mas kúıde bolǵany jáne kólikti júrgizýshi kýáligi joq adamǵa basqarýǵa bergeni anyqtaldy. Atalǵan fakti boıynsha quqyq buzýshylar ákimshilik jaýapkershilikke tartyldy. Materıaldar zańda belgilengen tártippen qaraý úshin sotqa joldandy. Abyroı bolǵanda, oqıǵa saldarynan zardap shekkender joq, — deıdi tártip saqshylary.
Abaı oblysy Polıtsııa departamenti eskertedi: mas kúıde kólik júrgizý jáne róldi júrgizýshi kýáligi joq adamǵa berý — zańdy óreskel buzý, ol aýyr saldarǵa ákelýi múmkin.
Osydan buryn Pavlodarda mas kúıde ári kýáliksiz kólik júrgizgen jasóspirim ustalǵanyn jazdyq.
