Abaı oblysynda Jastar resýrstyq ortalyǵynyń jańa ǵımaraty ashyldy
SEMEI. KAZINFORM - Búgin oblys ákimi Berik Ýálı Kýrchatov qalasyndaǵy Jastar resýrstyq ortalyǵy ǵımaratynyń saltanatty ashylý rásimine qatysty. Іs-sharaǵa jergilikti turǵyndar men ózge óńirlerden kelgen jastar jınaldy.
1949 jyly salynǵan ǵımarat ótken jyly qaıta jańǵyrtýdan ótip, bıyl paıdalanýǵa berildi. Jobanyń quny – 475 mln teńge. Jalpy aýmaǵy 1123,4 sharshy metr.
Zamanaýı úlgide jabdyqtalǵan ortalyq jastar resýrstyq jáne tilderdi damytý ortalyǵynyń jumysyna berildi. Munda ámbebap kovorkıng, psıhologııalyq jeńildetý oıyn bólmesi, VR/AR/AI tsıfrlyq zerthanasy, Open Space, lounge-aımaq, medıastýdııa, til ortalyǵy, art-laýndj jáne konsýltatsııalyq alańdar qarastyrylǵan.
Saltanatty rásimde aımaq basshysy jastar saıasatyn qoldaý óńir damýynyń basym baǵyttarynyń biri ekenin atap ótti.
-Memleket basshysy Qasym-Jomart Kemeluly Toqaev bıyl ǵalymdardy marapattaý rásiminde: «Qasıetti Otanymyz – Qazaqstandy bilim-ǵylymnyń, oıly ortanyń jáne sanaly jastardyń kúshimen túbegeıli jańǵyrtamyz. Keler urpaqqa Órkenıetti, Qýatty ári Ádiletti memleketti amanat etip qaldyramyz. Bul – bizdiń ulttyq paryzymyz» dep jastarǵa erekshe yqylas tanytty jáne úmit artty. Ózderińiz bilesizder, 15 naýryzdaǵy referendýmda qabyldanǵan Halyq Konstıtýtsııasynda bilim, ǵylym jáne ınnovatsııa basty qundylyqtardyń biri retinde belgilendi. Semeı qalasynda 3 joǵarǵy oqý oryny bar. Shákárim Ýnıversıteti, Medıtsınalyq Ýnıversıtet jáne Álıhan Bókeıhanov atyndaǵy Innovatsııalyq-Gýmanıtarlyq Zań ýnıversıteti. Sonymen qatar oblysta 32 kolledj jumys isteıdi. Munyń barlyǵy jastardyń búgingi zamanǵa saı ortaǵa beıimdelip jatqanynyń kórinisi. Júıeli jumystardyń nátıjesinde NEET sanatyndaǵy jastardyń sany oblysta tómendep keledi. Bul boıynsha kórsetkish 2023 jyly 4,4 paıyz bolsa, bıyl bul san 1,86 paıyzǵa deıin qysqaryp otyr. Sonymen qatar, óńirimizde jastardy maýsymdyq eńbekpen qamtyp, ekologııalyq mádenıetti qalyptastyratyn «Jasyl el» baǵdarlamasy sátti júzege asyrylýda. Osy salany qarjylandyrý, áleýmettik qoldaý jyl saıyn artyp keledi. Jastar – kez kelgen memlekettiń qozǵaýshy kúshi, eldiń erteńi. Sondyqtan óskeleń urpaqtyń qoǵam ómirine belsendi aralasýyna, jumyspen qamtylýyna, oqýyna jaǵdaı jasaý – memlekettik saıasattaǵy irgeli basymdyqtyń biri. Aldaǵy ýaqytta qalyptasatyn Ǵylym qalashyǵyna jańa bastaý, tyń serpilis berip, ıdeıalar fabrıkasyna, jańa jetistikterdiń mekenine aınalsyn! Barshańyzǵa sáttilik, tolaǵaı tabys tileımin! – dedi Berik Ýálı.
Shara barysynda oblys ákimi jastar resýrstyq ortalyǵy ishinen ashylǵan podkast stýdııanyń alǵashqy qonaǵy bolyp, jergilikti jastardyń saýaldaryna jaýap berdi.
Búginde Abaı oblysynda 150 myńǵa jýyq jas turady. Bul – óńir halqynyń tórtten biri. Óńirde 110 myńnan astam jas turaqty jumyspen qamtylǵan, al 38 myńnan astam stýdent joǵary oqý oryndary men kolledjderde bilim alyp jatyr.
Sońǵy jyldary jastardy áleýmettik qoldaý kólemi de artyp keledi. Bıyl «Abaı jastary» jeńildetilgen ıpotekalyq baǵdarlamasy aıasynda Semeı qalasynda 30 jas baspanamen qamtyldy. Sonymen qatar óńirde «Jasyl el» baǵdarlamasy júzege asyrylyp, jastardy maýsymdyq jumyspen qamtý jáne ekologııalyq mádenıetti qalyptastyrý baǵytyndaǵy jumystar jalǵasyp keledi.
Іs-shara aıasynda jastarmen jumys isteıtin mamandarǵa arnalǵan «Memlekettik jastar saıasaty mektebi» respýblıkalyq semınar-trenıngi uıymdastyryldy. Oǵan elimizdiń 12 oblysynan 30-dan astam maman qatysty.
