Kýrchatovta materıaldardy zertteý qondyrǵysy iske qosyldy
ASTANA. QazAqparat - Shyǵys Qazaqstan oblysynyń Kýrchatov qalasy QR Ulttyq ıadrolyq ortalyǵynda QTM Qazaqstandyq materıaltaný tokamagy qondyrǵysyn fızıkalyq iske qosýdyń birinshi kezeńi bastaý aldy, dep habarlaıdy QR Energetıka mınıstrliginiń baspasóz qyzmeti.
Osy biregeı joba Memleket basshysy Nursultan Nazarbaevtyń tapsyrmasy boıynsha Qazaqstannyń atom ǵylymyn damytý jáne álemdegi ITER-diń (International Thermonuclear Experimental Reactor) birinshi termoıadrolyq reaktory halyqaralyq jobasyn qoldaý maqsatynda Reseı Federatsııasymen tyǵyz yntymaqtastyq jasaı otyryp iske asyryldy.
«Qazaqstandyq Tokamak» - termoıadrolyq reaktordyń joǵary temperatýraly rejıminde jumys jasaıtyn materıaldardy zertteý jáne synaýǵa arnalǵan álemdegi jalǵyz qondyrǵy bolyp tabylady.
Termoıadrolyq energetıka - ekologııalyq taza, orasan zor otyn qorlary bar qaýipsiz jańa energııa kózi. Bul dástúrli kómirsýtekti energııa kózderin aýystyrýǵa múmkindik beretin, adamzattyń energetıkalyq túıindi máseleleriniń sheshimi bolyp tabylady.
Reaktorlyq materıaltanýǵa arnalǵan álemdegi birinshi tehnologııalyq tokamakta birlesken zertteýler júrgizý Qazaqstannyń dúnıejúzilik termoıadrolyq baǵdarlamada jetekshi oryndardyń birin alýǵa múmkindik beredi.
2017 jylǵy 26 mamyrda Reseı Federatsııasynyń Qazan qalasynda Táýelsiz Memleketter Dostastyǵynyń Úkimet basshylary keńesiniń otyrysynda Qazaqstandyq materıaltaný tokamagy bazasyndaǵy eksperımenttik keshendi birlesip paıdalaný týraly kelisimge qol qoıylǵany belgili.
Halyqaralyq «Astana-EKSPO-2017» kórmesin ótkizý sheńberinde 2017 jylǵy 11 maýsymda «Turaqty energetıkanyń damýyn qamtamasyz etý» Mınıstrlik konferentsııasy barysynda «QR Ulttyq ıadrolyq ortalyǵy» RMK-nyń bas dırektory E. Batyrbekov pen ITER halyqaralyq uıymynyń bas dırektory Bernar Bıgo arasynda Qazaqstandyq tokamakta birlesken ǵylymı-zertteý jumystary týraly kelisimge qol qoıyldy.
Energetıkalyq termoıadrolyq reaktorlardy qurý bolashaqta adamzatty taýsylmaıtyn, ekologııalyq taza energııa kózimen qamtamasyz etedi.
