Kýrchatovqa ǵylym qalasy mártebesi berilmek

SEMEI. QazAqparat – Abaı oblysynyń ákimi Nurlan Uranhaev Kýrchatov qalasynyń turǵyndarymen kezdesti. Kezdesý barysynda kóterilgen máseleniń biri – shaharǵa ǵylym qalasy mártebesiniń berilýi boldy, dep habarlaıdy QazAqparat tilshisi.

Óńir ákimdiginiń málimetine súıensek, qala halqy tarapynan kóterilgen máseleler negizinen turǵyn úı-kommýnaldyq sharýashylyǵy men abattandyrýǵa qatysty boldy.

Abaı jáne Olımpııskaıa kósheleriniń turǵyndary jylýmen durys qamtylmaı otyrǵandyqtaryn alǵa tartty.

Sondaı-aq turǵyndar úılerdi termojańǵyrtý baǵdarlamasy jáne baqylaý-ólsheý aspaptarymen jabdyqtaý baǵdarlamasy boıynsha qaıta jańǵyrtý qajettigin atap ótti.

Kezdesý barysynda jol jaıy da aıtyldy.

«Jol máselesin sheshemiz. Ol úshin aldymen jobalyq-smetalyq qujattama jasaý qajet», - dedi aımaq basshysy.

Onyń aıtýynsha, Kýrchatovty ǵylym qalasyna aınaldyrý kózdelip otyr.

«Kýrchatov óte ádemi, yqsham shahar. Ony ǵylym qalasyna aınaldyrý josparlanýda. Sonyń nátıjesinde, qala odan ári damıdy dep senemiz», - dedi Nurlan Uranhaev.

Sodan soń Nurlan Uranhaev azamattardy jeke máseleleri boıynsha qabyldady.

Qala turǵyndary arasynan qoǵamdyq kólikke qatysty saýal qoıǵandar boldy. Oblys ákimi kóterilgen máselelerdi nazarǵa alyp, tıisti tapsyrmalar berdi.