Kýrchatov qalasyndaǵy aýrýhanaǵa jańa medıtsınalyq jabdyqtar jetkizildi – ShQO
ÓSKEMEN. QazAqparat – Shyǵys Qazaqstan oblysy Kýrchatov qalasynda koronovırýs ınfektsııasymen aýyrǵandardy emdeýge qajetti medıtsınalyq apparattardy alý úshin 20 mln teńge jaratyldy, dep habarlaıdy QazAqparat tilshisi.
Bul jaıly ShQO Aqparattyq ortalyǵynda ótken baspasóz brıfıngi barysynda Kýrchatov qalasynyń ákimi Alekseı Glazınskıı málimdedi.
Qalalyq aýrýhana jergilikti jurtqa qyzmet kórsetetin jalǵyz kóp salaly medıtsınalyq mekeme. Aýrýhana dúıim jurtqa statsıonarlyq kómek kórsetedi: somatıkalyq bólimshede 40 tósek oryn bar, onyń quramyna: terapevtik, hırýrgııalyq, gınekologııalyq, bosaný, ınfektsııalyq, pedıatrlyq, medbıkelik kómek, pallıatıvtik kómek tósek oryndary, sondaı-aq statsıonarlyq 20 tósek-orny kiredi.
«Qalalyq aýrýhanada 22 dáriger jáne 81 orta medıtsınalyq personal jumys isteıdi. Aýrýhanany jańa medıtsınalyq jabdyqtarmen jabdyqtaý maqsatynda birqatar sharalar atqaryldy. Pandemııa kezinde qaıyrymdylyq aıasynda Ulttyq ıadrolyq ortalyǵymen koronovırýs ınfektsııasymen aýyrǵandardy emdeýge qajetti apparattardy satyp alý úshin 20 mln teńge bólindi», – deıdi Alekseı Glazınskıı.
Osy jyldyń qorytyndysynda qalada týberkýlez boıynsha turaqty epıdemıologııalyq jaǵdaı belgilendi, jańadan paıda bolǵan qaterli isikterden kóz jumǵandar tirkelmedi. Ana ólimi bolmaǵanymen, 1 bala ólimi tirkelgen. Sonymen qatar turǵyndardy tegin dári-dármektermen qamtamasyz etý maqsatynda 28 101 941 mln teńge jumsaldy.
