Kýrchatov qalasy men Abaı aýdanynyń ákimderi saılanady
Búgin Abaı oblysy máslıhatynyń kezekten tys jetinshi sessııasy ótti. Sessııa jumysyna aımaq basshysy Nurlan Uranhaev, oblystyq máslıhat depýtattary men memlekettik mekemeler basshylary qatysty.
«Prezıdent Qasym-Jomart Toqaev VIII shaqyrylymdaǵy QR Parlamentiniń birinshi sessııasynyń ashylý saltanatynda bıyl elimizde alǵash ret 45 aýdan jáne oblystyq mańyzy bar qala ákimderiniń saılaýy ótetinin málimdegen bolatyn. Atalǵan 45 óńirdiń ekeýi Abaı oblysyna tıesili. Abaı oblysy máslıhatynyń sheshimimen pılottyq óńirler bolyp tabylatyn Kýrchatov qalasy men Abaı aýdany ákimderiniń saılaýy 5 qarasha kúni ótedi dep bekitildi», - dep habarlady ákimdiktiń baspasóz qyzmetinen.
Bul saılaý Qazaqstan tarıhyndaǵy jergilikti aýdan, qala ákimderiniń saılaýyn ótkizýdegi alǵashqy tájirıbe bolmaq.
Aıta keteıik, búginde elimizde aýyl ákimderiniń 64 paıyzy jergilikti jurttyń tikeleı saılaýymen qyzmetke kelgen.
