Kýrchatov qalasynda kondensatsııalyq elektr stantsııasynyń qurylysy bastaldy
SEMEI. KAZINFORM — Búgin Kýrchatov qalasynda qýaty 700 Megavatt bolatyn jańa kondensatsııalyq elektr stantsııasynyń (KES) irgetasyn qalaý rásimi ótti. Mańyzdy sharaǵa oblys ákimi Berik Ýálı, Energetıka vıtse-mınıstri Suńǵat Esimhanov, «Kýrchatov» KES jobasynyń ınvestory Temirlan Ótegenov qatysty.
«Kýrchatov» KES jobasy — elimizdiń energetıkalyq ınfraqurylymyn damytýǵa, óńirdiń ekonomıkalyq áleýetin arttyrýǵa jáne ınvestıtsııalyq tartymdylyǵyn kúsheıtýge baǵyttalǵan iri strategııalyq bastama. Jańa elektr stantsııasy Qazaqstannyń energetıkalyq qaýipsizdigin nyǵaıtyp, elektr qýaty tapshylyǵynyń táýekelderin azaıtýǵa, ónerkásiptiń damýyna serpin berýge jáne jańa ınvestıtsııalar tartýǵa múmkindik jasaıdy.
Jobany iske asyrý merzimi 2026–2032 jyldarǵa josparlanǵan. Stantsııa tolyq paıdalanýǵa berilgennen keıin jylyna 5 mıllıard kVt·saǵatqa deıin elektr energııasyn óndiredi. Bul óńirdiń ónerkásiptik áleýetin arttyryp, eldiń biryńǵaı energetıkalyq júıesiniń turaqtylyǵyn kúsheıtýge yqpal etedi.
Jobanyń áleýmettik mańyzy da zor. Qurylys kezeńinde 5 myńǵa deıin adam jumyspen qamtylsa, stantsııa iske qosylǵannan keıin 400 turaqty jumys orny ashylady. Bul Kýrchatov qalasy men jalpy Abaı oblysynyń áleýmettik-ekonomıkalyq damýyna oń áserin tıgizedi.
Saltanatty rásimde sóz sóılegen aımaq basshysy bul joba elimizdiń energetıkalyq táýelsizdigin nyǵaıtýǵa baǵyttalǵan mańyzdy bastama ekenin atap ótti.
— Búgin biz Abaı oblysy úshin ǵana emes, búkil Qazaqstan úshin tarıhı mańyzy bar oqıǵanyń kýási bolyp otyrmyz. Qýaty 700 megavatt bolatyn Kýrchatov kondensatsııalyq elektr stantsııasynyń irgetasyn qalap, bolashaqqa arnalǵan estelik kapsýlany salýdamyz. Bul — elimizdiń energetıkalyq qaýipsizdigin nyǵaıtýǵa, ekonomıkanyń turaqty damýyn qamtamasyz etýge baǵyttalǵan úlken strategııalyq joba. Memleket basshysy Qasym-Jomart Kemeluly Toqaev elimizdiń energetıkalyq táýelsizdigin kúsheıtip, jańa generatsııalaý qýattaryn iske qosýdy basym mindetterdiń biri retinde aıqyndady. Búgingi joba — osy mańyzdy tapsyrmalardy júzege asyrý jolyndaǵy naqty qadam. Jańa energetıkalyq nysandardy iske qosý — ýaqyt talaby. Bizdiń oblys elimizdiń energetıkalyq áleýetin nyǵaıtýǵa qomaqty úles qosyp keledi. Stantsııa paıdalanýǵa berilgennen keıin 400 turaqty jumys orny qurylady. Bul jergilikti kásipkerliktiń damýyna, ınfraqurylymnyń jańarýyna jáne oblys ekonomıkasynyń jańa deńgeıge kóterilýine septigin tıgizedi. Eń bastysy — bul joba Kýrchatov qalasynyń odan ári ındýstrııalyq damýyna serpin beredi. Osy mańyzdy jobany júzege asyrýǵa qoldaý kórsetken Qazaqstan Respýblıkasynyń Prezıdentine, Úkimetke, Energetıka mınıstrligine, ınvestorlarǵa jáne osy qurylysqa atsalysatyn barsha azamattarǵa oblys jurtshylyǵy atynan shynaıy rızashylyǵymdy bildiremin, — dedi Berik Ýálı.
Energetıka vıtse-mınıstri Suńǵat Esimhanov bul jobanyń elimizdiń energetıka salasynyń ǵana emes, el ekonomıkasynyń damýyna tyń serpin beretinin aıtty.
Qazirgi ýaqytta Ertis ózenindegi Shúlbi sý elektr stantsııasy 702 MVt ornatylǵan qýatymen respýblıkanyń negizgi gıdroenergetıkalyq nysandarynyń biri sanalady. Alaıda gıdroenergetıka sý resýrstarynyń kólemine táýeldi bolǵandyqtan, eldiń energetıkalyq júıesiniń senimdiligi úshin generatsııa kózderin ártaraptandyrý mańyzdy.
Osy baǵytta Abaı oblysynda birneshe iri energetıkalyq joba qatar júzege asyrylýda. Atap aıtqanda, qýaty 350 MVt bolatyn Semeı sý elektr stantsııasynyń qurylysy josparlanǵan. Sonymen qatar Shúlbi sý elektr stantsııasynyń ekinshi kezeńi iske asyrylyp, onyń qýaty 702 MVt-tan 1050 MVt-qa deıin ulǵaıtylady. Budan bólek, Semeı qalasynda qýattylyǵy 360 MVt bolatyn JEO-3 qurylysy josparlanyp otyr.
