Kýrchatov ǵylym ordasyna aınalmaq: Qalashyqta qandaı jobalar iske asady
ASTANA. KAZINFORM — Kýrchatov qalasyna ǵylymı qalashyq mártebesin 2027 jyldyń úshinshi toqsanynda berý josparlanyp otyr. Bul týraly Ǵylym jáne joǵary bilim mınıstrliginen málim etti.
— Qazaqstan Respýblıkasynyń 2026 jylǵy 24 maýsymdaǵy № 321-VIII Zańyna sáıkes «ǵylymdy qajet etetin aýmaq» jáne «ǵylymı qalashyq» uǵymdary zańnamalyq deńgeıde bekitilip, tıisti mártebeni berý tártibi aıqyndaldy. Kýrchatov qalasy 2026–2035 jyldarǵa arnalǵan ǵylymdy qajet etetin aýmaqtardy qurý jáne damytý tujyrymdamasyna sáıkes ǵylymdy qajet etetin aýmaqtardy damytýdyń alǵashqy alańy retinde aıqyndaldy. Bolashaq ǵylymı qalashyqtyń negizin Qazaqstan Respýblıkasynyń Ulttyq ıadrolyq ortalyǵynyń ǵylymı-tehnologııalyq áleýeti quraıdy. Qazirgi ýaqytta Kýrchatov ǵylymı qalashyǵyn qurý jónindegi jumystar praktıkalyq kezeńge ótti, — dep atap ótti vedomstvodan agenttiktiń resmı saýalyna oraı.
Mınıstrlik málimetinshe, Atom energııasy jónindegi agenttik Ulttyq ǵylym akademııasymen, Ulttyq ıadrolyq ortalyqpen jáne Abaı oblysynyń ákimdigimen birlesip, 2027–2031 jyldarǵa arnalǵan Kýrchatov ǵylymı qalashyǵyn qurýdyń egjeı-tegjeıli josparyn ázirledi. Atalǵan josparda ǵylymı, óndiristik, kadrlyq jáne áleýmettik ınfraqurylymdy damytý jónindegi sharalar kózdelgen. Jospar aıasynda ıAdrolyq ınjenerııa salasyndaǵy quzyretter ortalyǵyn jáne Basqarylatyn termoıadrolyq sıntez tehnologııalaryn damytý jónindegi halyqaralyq ortalyqty qurý, ǵylymı ortalyqty damytý, jańa jumys oryndaryn ashý, atom salasy úshin kadrlar daıarlaý, sondaı-aq turǵyn úı jáne áleýmettik ınfraqurylymdy damytý kózdelgen.
— Kelesi kezeńde Kýrchatov qalasyna ǵylymı qalashyq mártebesin berý týraly usynysty daıyndaý jáne engizý júzege asyrylady. Sonymen qatar basym ǵylymı baǵyttardy aıqyndaı otyryp, qalany damytý strategııasy ázirlenedi. Atalǵan strategııa kelisilgennen keıin Joǵary ǵylymı-tehnıkalyq komıssııanyń bekitýine engiziledi. Kýrchatov qalasyna ǵylymı qalashyq mártebesin 2027 jylǵy III toqsanda berý josparlanǵan. Budan ári ǵylymı qalashyqty damytý 2027-2031 jyldarǵa arnalǵan egjeı-tegjeıli josparǵa sáıkes kezeń-kezeńimen júzege asyrylady, — dep naqtylaıdy Ǵylym mınıstrligi.
Buǵan deıin Úkimet Kýrchatovta qýaty 700 MVt elektr stansasyn salý jónindegi 881 mlrd teńgelik ınvestıtsııalyq kelisimdi maquldaǵan edi.
