Qurbysyn pyshaqtap óltirgen kelinshek 9 jylǵa sottaldy - Qyzylorda
QYZYLORDA. QazAqparat - Qyzylordada qurbysyn pyshaqtap óltirgen kelinshek 9 jylǵa sottaldy. Bul týraly oblystyq sottyń baspasóz qyzmeti habarlady.
Oqıǵa byltyr jeltoqsan aıynyń sońyna qaraı túngi úshter shamasynda bolǵan. Sottalýshy J.Aqmambetova kúıeýimen ekeýi - januıasymen aralasyp júrgen dostary, erli-zaıypty A.Begalıeva, B.Orazalıevpen birge, tórteýi ishimdik iship otyrǵan.
Іshimdik ishý barysynda sottalýshy Aqmambetova men úı ıesi Begalıevamen sózge kelip, aralarynda janjal týyndaǵan. Janjal barysynda J.Aqmambetova A.Begalıevany ashana pyshaǵymen keýdesinen jaraqattaǵan. Zardap shegýshi sol jerde aýyr jaraqattan qaıtys bolǵan.
Sotta aıyptalýshy kinásin moıyndamaı «kúıeýim pyshaqtady dep» jaýaptylyqtan bosatýdy suraǵan.
Іs boıynsha tóraǵalyq etýshi sýdıa A.Sabyrov isti jan-jaqty qarap, kýálar men jábirlenýshiler jáne sarapshy mamandardyń pikirlerin tyńdap, is qujattaryn muqııat zerttep aıyptaý úkimin jarııalady.
Sot úkimimen sottalýshy J.Aqmambetova QR QK-niń 99 babynyń 1 bóligimen kináli dep tanylyp, 9 jylǵa bas bostandyǵynan aıyryldy. Jazasyn jalpy rejımdegi túzeý kolonııasynda óteýge dep belgilendi. Sonymen qatar, sottalýshy jábirlenýshiniń týystaryna 2 mıllıon moraldyq zııan tóleıtin boldy.
Aıta ketetin jaıt, qaıtys bolǵan jábirlenýshiniń de, sottalýshy kelinshektiń de ár qaısynynda 2 kishkentaı balalary bar.
Úkim zańdy kúshine engen joq.
