Qurbanovtyń kúmisinen keıin Qazaqstan medaldar kestesinde birer saty kóterildi

PARIJ. KAZINFORM — Frantsııa astanasy Parıj qalasynda ótip jatqan Olımpıada oıyndarynda búgin sporttyq gımnastıkanyń at snarıadyndaǵy jattyǵýda Narıman Qurbanov kúmis júlde jeńip alǵannan keıin Qazaqstan quramasy jalpy medaldar kestesinde birer saty joǵary kóterildi.

Atap aıtsaq, Qurbanovtyń júldesine deıin Qazaqstan quramasy jalpy medaldar kestesinde 29-orynda turǵan edi. Qurbanovtiń kúmis júldesinen keıin birden 26-orynǵa kóterildi.

Osylaısha, dál qazir Qazaqstan quramasynyń qorjynynda 1 altyn, 1 kúmis, 2 qola medal bar.

Al, jalpy medaldar sany boıynsha Qytaı quramasy kóshbasshylyqty berer emes. Olar altyn medaldar sanyn 16-ge jetkizdi. Odan bólek, 11 kúmis, 9 qola júldesi bar. Al ekinshi orynda dál qazirgi kórsetkish boıynsha Avstralııa quramasy kele jatyr. Olardyń enshisinde 12 altyn, 7 kúmis, 5 qola bar. Úzdik úshtikti 11 altyn, 20 kúmis, 20 qola júldemen AQSh quramasy túıindep tur.

Esterińizge sala ketsek, Frantsııa astanasy Parıj qalasynda ótip jatqan XXXIII jazǵy Olımpıada oıyndary 11 tamyzda máresine jetedi.

Oıyndarǵa álemniń 205 elinen 10 500 sportshy qatysyp jatyr. Olımpıadashylar 32 sport túrinen 329 medal jıyntyǵyn sarapqa salýda.