Qurbandyqqa shalynǵan mal etin alý úshin meshitke kelýdiń qajeti joq - ımam

ALMATY. QazAqparat - Almatyda Qurban aıt kúnderi qurbandyqqa shalynǵan etti muqtaj jandarǵa jetkizip berý uıymdastyrylady. Bul týraly Almaty qalasy Bostandyq aýdany «Baıken» meshitiniń Bas ımamy Danııar Jumabaev aıtty, dep habarlaıdy QazAqparat tilshisi.

Imamdar halyqty jappaı meshitke barmaýǵa shaqyrdy.

«Bıylǵy jyly Qurban aıt dástúrli merekesiniń aıasynda karantındik shekteý sharalaryna baılanysty meshitter janynda qurbandyq shalynbaıdy jáne onyń eti taratylmaıdy. Qurbandyqqa shalynǵan etti alýǵa ótinish bildirgenderge meshitke kelýdiń qajeti joq. Qurbandyq eti arnaıy qurylǵan shtab arqyly muqtaj jandardyń úılerine jetkiziledi», - dedi Danııar Jumabaev.

Imam karantın talaptaryn saqtaý úshin Almaty qalasynyń meshitterinde merekelik Aıt namazy oqylmaıtynyn aıtty.

Qurbandyq shalýǵa ótinish berý jáne muqtaj, az qamtylǵan qala turǵyndarynyń et alýǵa qaldyrǵan ótinishterin alý Qurban2020.kz saıty arqyly 24 shildeden 30 shilde aralyǵynda júrgiziledi. Osy ýaqytqa deıin 1305 adam et alýǵa ótinish bildirgen.

2 jáne 3 tamyz kúnderi qurbandyqqa shalynǵan et taratylady.

Qosymsha aqparatty 8(700)7197622, 8(727)3976390 baılanys telefondary arqyly bilýge bolady.

Aıta ketý kerek, Almatyda polıtsııa qala terrıtorııasynda Qurban aıt meıramy kezinde mal ákelýge, mal soıýǵa tyıym salyndy. Osy talaptardy qadaǵala úshin qalanyń aınalasynda 14 polıtsııa posty qoıylady.