Qurbandyq shalatyn oryndarǵa barý úshin aldyn ala jazylý qajet – Dinı basqarma
«Ár óńirdegi QMDB jumys tobynyń call-ortalyqqa qońyraý shalyp, aldyn ala jazylý kerek. Arnaıy tizim jasalyp, qurban shalýǵa nıetti tulǵaǵa kezek sany men baratyn naqty ýaqytyn habardar etýi qajet. Bári birdeı bir ýaqytta barmaý úshin, árkim talon sekildi óz kezegimen baryp qurbandyq shalady», - dep túsindirdi QMDB tóraǵasynyń orynbasary, naıb múftı Ershat Ońǵar Ortalyq kommýnıkatsııalar qyzmetinde ótken baspasóz máslıhatynda.
20 shilde kúni saǵat 7:20 dan bastap «sary», «jasyl» aımaqtaǵy óńirlerde aldyn ala jazylǵan tulǵalar belgilengen ýaqytta arnaıy qasaphanada qurban shalady, árbir adamǵa 1 saǵat ýaqyttan beriledi.
«Oflaın formatta qurban shalýshy QMDB-nyń jaýapty tulǵasyna «ASHYQ» baǵdarlamasyndaǵy óz statýsyn kórsetýi qajet. «Jasyl» jáne «kók» tústerdegi tulǵalar qasaphana ǵımaratyna kire alady, «qyzyl» jáne «sary» tústerdegi tulǵalarǵa ruqsat etilmeıdi», - deıdi E. Ońǵar.
Qurbandyq etin et saqtaıtyn oryndarǵa jóneltý jáne jetkizýmen eriktiler, ımamdar aınalysady. Bul tegin bolady. Qurban etterin jaǵdaıy tómen otbasylar, jetimder men qarttar úıi jáne áleýmettik jaǵdaıy osal toptarǵa taratylady.
«Qaspahanalarda tazalyqqa mán berilip, sanıtarlyq talaptardyń saqtalýyn qatań qadaǵalaýdy qolǵa aldyq. Kúni keshe Bas múftı jumys tobymen birge qasaphana tazalyǵyn, mal soıatyn oryndar men soıylatyn maldy kórip qaıtty. Qurbandyq malyn soıdyrýǵa, satyp alýǵa, satý, ony soıý kezinde sanıtarlyq talaptar, tazalyq jaǵyna mán berýge shaqyramyz. Dinimizde tazalyqtyń mańyzy joǵary», - dedi Ershat Ońǵar.
