Qurban shalý rásimin qashyqtan ótkizýge arnalǵan saıt iske qosyldy

ASTANA. QazAqparat – Qazaqstan musylmandary dinı basqarmasy Qurban shalý rásimin qashyqtan ótkizýge arnalǵan qurban2023.kz saıtyn iske qosty, dep habarlaıdy QazAqparat.

«Musylman qaýymynyń qasıetti aıt merekesine oraı, barsha qazaq elin «Qurban-2023» qaıyrymdylyq aktsııasyna úles qosýǵa shaqyramyz. Halyqqa, ásirese úlken qalalarda turatyn jamaǵatqa ońtaıly bolý úshin bıyl qurban shalý oflaın jáne onlaın formatta júzege asady.

Aıta ketsek, onlaın túrde qurban shalam deýshiler saıt arqyly qurbandyq malyn tańdap, kórsetilgen rekvızıtke qajetti qarajatty aýdara alady. Qoı men eshkini jeke adam, al iri qara men túıe malyn bir nemese 7 adam birigip shalsa bolady. Budan keıin tólem barysynda habarlamaǵa tapsyrys nómiri men qurbandyq shalýshynyń aty-jónin jazý mindetti. Qurbandyq shalynǵan soń onyń foto jáne beıne esebi tapsyrys berýshi kórsetken WhatsApp nómirge jiberiledi», - delingen resmı habarlamada.

Eske salsaq, Qazaqstan musylmandary dinı basqarmasy 2023 jylǵy dinı kúnder kestesin bekitken bolatyn. Soǵan sáıkes, Qurban aıttyń birinshi kúni 28 maýsymǵa túsip tur. Aıta keteıik, úsh kúndik merekeniń alǵashqy kúni elimizde demalys sanalady.