Qurban aıttyń qurmetine álem elderinde jasalyp jatqan sharalar
ASTANA. QazAqparat - Qurban aıttyń qurmetine álem elderinde kóptegen qaıyrymdylyq ister atqarylyp jatyr.
Atap aıtqanda, Dýbaıda Qurban 488 adamǵa rahymshylyq jasalǵan. Osy máseleni prokýratýra merekege deıin sheshýge áreket jasaýda. Tek Dýbaıda ǵana emes, Sharjy, Ras-ál-Haıma jáne Ajman emırattarynda da bul ıgi is jalǵasyna tabýda, dep jazady muslim.kz.
Esterińizge sala keteıik, BAÁ prezıdenti sheıh Halıfa ben Zaıd ál-Nahaııannyń jarlyǵymen 442 adam rahymshylyqqa ilingen bolatyn. Taǵy aıta keterligi, qurban aıttyń qurmetine bul elde bir aptalyq demalys jarııalanǵan.
Tatar respýblıkasy da qurban aıtqa qyzý daıyndyq ústinde. Meıram kezinde 10 myńǵa jýyq mal qurbandyqqa shalynady dep josparlanýda. Oǵan 17 arnaıy oryn bólingen. Qurbandyq etteri muqtaj jandarǵa taratylady. Sondaı-aq, mereke kúni qoǵamdyq kólikter óz jumysyn ádettegiden erte bastamaq. Aqyly avtoturaqtar meıram kúnderi tegin bolady.
Bashqurstan astanasy Ýfa qalasynda qurban aıt merekesine oraı Kurban Halal Fest degen ataýmen aýqymdy shara uıymdastyrylatyn bolady. El turǵyndarynyń basym kópshiligi sol sharaǵa qatysyp, meıramdy kóńildi ótkizýge tyrysady.
Máskeý oblysynda da qasıetti merekege daıyndyq qyzý júrip jatyr. Arnaıy mal soıatyn oryndar bolmasa da, meıramnyń qurmetine 38 oryn daıyndalypty. Qurban shalýǵa nıet bildirgender osy arnaıy oryndarǵa baryp maldaryn qurbandyqqa shala alady.
AQSh-ta qurban aıttyń qurmetine arnaıy pochta markalary shyǵarylǵan. Bul pochta markalary musylmandardyń eki úlken merekesi Oraza aıt pen Qurban aıttyń kelýine oraı shyǵarylyp turady. Sondaı-aq, AQSh-tyń birqatar mektepteri qurban aıt kezinde demalý quqyǵyna ıe boldy.
