Qurban Aıttyń ekinshi kúni 30 myńnan astam otbasyǵa et taratyldy – QMDB

NUR-SULTAN. QazAqparat – Aıt merekesiniń ekinshi kúni Qazaqstanda 32 896 otbasyǵa et taratyldy, dep habarlaıdy QazAqparat Qazaqstan musylmandary dinı basqarmasyna silteme jasap.

Jumys barysynda sanıtarlyq talaptardyń saqtalýy qatań qadaǵalandy.

«Ulyq meıramda qaıyrymdylyq sharasyn jandandyra túsý maqsatynda qurylǵan arnaıy jumys toby Qurban aıttyń ekinshi kúni respýblıka boıynsha 32 896 muqtaj otbasyǵa qurbandyq etin jetkizdi. Elimiz boıynsha www.qurban2021.kz saıtyna qashyqtan qurban shalýǵa tapsyrys bergen azamattardyń ýákildik qurbandyǵy tolyǵymen oryndaldy. Osy ýákildik qurbandyǵynyń esebin qajet etken jandarǵa atqarylǵan is-sharalardyń foto, vıdeo málimeti tolyq jiberildi», - delingen QMDB habarlamasynda.

Aıttyń ekinshi kúni qurban2021.kz saıty arqyly qurban shalýǵa 2 724 tapsyrys kelip túsken jáne respýblıka kóleminde 4246 qoı, 219 eshki, 523 sıyr jáne 6 túıe soıyldy.

Eske sala ketsek, aıttyń birinshi kúni QMDB-nyń aımaqtaǵy ókildikteri kómekke zárý 40 156 otbasyǵa qurbandyq etin jetkizdi. Jalpy alǵanda barlyq oblysty qamtyǵanda Qurban aıttyń eki kúninde 73 052 januıaǵa et jetkizildi.