Qurban aıtty úıde namaz oqyp, duǵa jasap qarsy alýǵa da bolady – QMDB ókili

NUR-SULTAN. QazAqparat – Eldegi karantınge baılanysty bıyl musylman qaýymynyń Qurban aıt meıramyn qarsy alý rásimine ózgerister engizildi. Basty talap - saqtyq sharalaryn buzbaý. Koronavırýs kezinde atalǵan merekeni qarsy alý men onyń ereje-talaptary týraly QazAqparat tilshisine Qazaqstan musylmandary dinı basqarmasy Dinı bilim jáne kadr daıyndaý bóliminiń meńgerýshisi Smaıyl Seıtbekov áńgimelep berdi.

«Álemdi jaılaǵan koronavırýs indetin joıý maqsatynda árbir azamat aldymen saqtyq sharalaryn ustanǵan jón. Bul indet kóptegen josparlar men belgilengen sharalardyń sol sııaqty aıtýly merekelerdiń atalyp ótilýine shek qoıyp otyr. Osyǵan baılanysty Qazaqstan musylmandary dinı basqarmasy barsha qaýymnan óz qaýipsizdikteri úshin karantın erejelerin buzbaýǵa shaqyrady. Sonymen qatar halyqtan bıylǵy Qurban aıt meıramyn burynǵydaı bazarǵa baryp mal alyp soıyp, qonaq shaqyryp, qonaqqa baryp aıttaýdy toqtata turýyn ótinemiz», - dedi Smaıyl Seıtbekov.

Onyń aıtýynsha, atalǵan meıramdy ár pende óz otbasymen qarsy alyp, úıde otyryp duǵa-tilek jasaǵany abzal.

«Azamattarymyz meshitke barmadyq, aıt namazy oqylmady, burǵynǵydaı qurbandyq shalmadyq dep qynjylmaýy tıis. Qurban aıtty árbir pende úıde otyryp namaz oqyp, duǵa jasap qarsy alýǵa da bolady. Bıylǵy Qurban aıtty qarsy alýdyń ereksheligi sol, meshitterde aıt namazynyń oqylmaýy. Degenmen ár pende óz úıinde oqýyna bolady. Qaýipsizdik maqsatynda elimizdiń bas sanıtar dárigeriniń talaby boıynsha qurbandyq shalýǵa ruqsat joq. Al aýyldyq jerde halyqtyń shoǵyrlanýy az jáne jer úı bolǵandyqtan qurbandyq shalýǵa kedergi joq. Qalalyq jerde qurbandyq shalýǵa tyıym salynǵan. Al nıetti kisiler úshin bizdiń basqarma Qurban2020.kz saıtyn iske qosty», - deıdi ol.

Basqarma ókiliniń málimdeýinshe, Qurban aıtty qarsy alý sátinde árbir azamat qaýipsizdik qaǵıdasyn qatań ustanyp, ortaq erejege baǵynǵany jón.

«Qurbandyq shalýǵa qatysty aıtyp ótetin taǵy bir másele bar. Qurbandyq ıesi burynǵydaı ettiń úshten bir bóligin ózine alyp kete almaıdy. Sol úshin azamattardan túsinispeýshilikpen qaraýyn suraımyz. Óıtkeni qurbandyqtyń úshten bir bóligin alýǵa adamdar kelse, kezekke turý bastalady, ondaı jaǵdaıda sanıtarlyq shara saqtalmaıdy degen sóz. Qurbandyqqa shalynǵan etke kelsek, bizde muqtaj jandardyń tizimi bar, sol kisilerge teńdeı úlestiriledi», - dedi S. Seıtbekov.