Qurban aıtty toılaýdyń ulttyq ereksheligimizge saı formaty qalyptasty - Nurlan Ermekbaev
ASTANA. QazAqparat - QR Din isteri jáne azamattyq qoǵam mınıstri Nurlan Ermekbaevtyń qazaqstandyqtardy Qurban aıt meıramymen quttyqtady.
«Búgingi tańda Qurban aıt meıramyn toılaýdyń ulttyq erekshelikterimizge saı formaty qalyptasyp, osynaý qasterli mereke Qazaqstan halqynyń birligin, konfessııalar arasyndaǵy ózara túsinistikti nyǵaıtýǵa yqpal etip keledi», - delingen mınıstrdiń quttyqtaýynda.
Din isteri jáne azamattyq qoǵam mınıstri bul mereke - tek musylmandarǵa ǵana emes, barlyq adamzat balasyna qaırymdylyq jasaýǵa shaqyratyndyǵyn málim etti.
«Jaǵdaıy jetkenderdiń qurban shalyp, onyń etin turmysy tómenderge taratýy halqymyz arasynda aýyzbirshilik pen tatýlyqtyń, adamdardyń áleýmettik jaǵdaıyna qaramastan bir-birlerimen qushaq jaıa aralasýyna múmkindik týǵyzady.
Qurban Aıt kúnderinde adamdar bir-birin quttyqtap, bir-biriniń úıinen dastarqannan dám tatady, bul kúni ádette musylmannyń úıinde dastarqan jaıylady», - dedi mınıstr.
Onyń aıtýynsha adam balasynyń ómirin tek materıaldy ıgilikter ǵana quramaıdy, ıaǵnı baqytqa jetýde rýhanı negizderdiń mańyzdy orny bar.
«Dástúrli dinimizdiń jasampaz áleýeti rýhanı-ónegelik qundylyqtardy damytýǵa jáne otansúıgishtik rýhyna negizdele otyryp, qoǵamdaǵy tatýlyq pen konfessııaaralyq kelisimdi órkendetýge odan ári qyzmet ete beredi dep senemin.
Búgingi Qurban aıt merekesi rýhanı serpilisimizge sebepker bolyp, árbir shańyraqqa qut-bereke ákelsin.
Barsha qazaqstandyqtarǵa zor densaýlyq, bereke, baqyt jáne mol tabys tileımin! Aıt qabyl bolsyn!», - dedi Nurlan Ermekbaev.
