Qurban aıttyń rýhanı sátteri: elordadan fotoreportaj
ASTANA.KAZINFORM – Búgin Qazaqstan musylmandary úshin qasıetti Qurban aıt merekesi bastaldy. Ataýly kúnge oraı elimizdiń barlyq óńirinde aıt namazy oqyldy.
Elordadaǵy Respýblıkalyq Bas meshitte Qurban aıt namazyn Qazaqstan musylmandary dinı basqarmasynyń tóraǵasy Naýryzbaı qajy Taǵanuly júrgizdi. Namazǵa jınalǵan jamaǵatqa Bas múftı Qurban aıttyń rýhanı mańyzy jaıynda ýaǵyz aıtyp, halyqty izgilik pen sabyrlyqqa, meıirim men birlikke shaqyrdy.
– Alla Taǵala pendeleriniń izgilik amal atqaryp, kóbirek saýap ister jasaýy úshin keıbir kúnder men túnderdi basqalarynan artyq etip qoıdy. Sondaı musylman balasynyń Jaratýshysynyń keshirimine bólenýge tyrysyp, izgi amaldarǵa erekshe ynta tanytýy qajet ýaqyttyń biri – osy Qurban aıt merekesiniń kezeńi. Bul aı musylman kúntizbesinde zulhıjja aıy dep atalady, – dedi Naýryzbaı qajy Taǵanuly.
Sondaı-aq, Bas múftı zulhıjja aıynyń alǵashqy on kúniniń mańyzyn atap ótti.
– Bul aıdyń alǵashqy on kúninde jasalatyn ǵıbadattardyń qadiri óte joǵary. Alla Taǵala qasıetti Qurannyń «Fájr» súresinde: «Tań shapaǵyna sert. Jáne (múbárák) on túnge sert», – dep aıtqan. Ardaqty Paıǵambarymyz (oǵan Allanyń salaýaty men sálemi bolsyn) bul kúnder jaıly: «Alla Taǵalaǵa osy (on) kúnde istelgen ıgi isten jaqsyraq amal joq» (ımam Buharı), – degen, – dedi Bas múftı óz sózinde.
Aıt namazynan keıin Naýryzbaı qajy Taǵanuly el amandyǵy men birligi úshin arnaıy duǵa jasap, ata-babalar rýhyna Quran aıattaryn baǵyshtady.
Sonymen qatar qasıetti Qurban aıt merekesi qarsańynda elordadaǵy «Áziret Sultan» meshitinde aıt namazy oqylyp, jamaǵatqa ýaǵyz nasıhat aıtyldy.
Namazǵa kelgen jamaǵatty Qazaqstan musylmandary dinı basqarmasynyń ókili, Áziret Sultan meshitiniń naıb ımamy Sadyrhanov Jumanazar Óserhanuly quttyqtap, merekeniń mán-mańyzyna toqtaldy.
Aıta keteıik, Qasym-Jomart Toqaev qazaqstandyqtardy Qurban aıt merekesimen quttyqtaǵanyn jazǵanbyz.
Eske sala keteıik, oraza aıt merekesi sátterinen fotoreportaj ázirlep, oqyrmanǵa meshitterdegi rýhanı atmosferany usynǵan edik.
Qasaphanalar, QMBD eskertýi, arnaıy saıt – Qurban aıtqa qatysty mańyzdy málimetterdi osy jerden oqı alasyz.
