Qurban aıtta Túrkistan oblysy meshitterinde kıiz úıler tigilip, aıttyq taratylady

TÚRKІSTAN. QazAqparat - Qurban aıt merekesi oraı Túrkistan oblysyndaǵy meshitterde kıiz úıler tigilip, merekelik sharalar ótedi. Bul týraly óńirlik kommýnıkatsııalar qyzmetinde ótken brıfıngte Túrkistan oblysynyń bas ımamy Erjan Tólepov málimdedi, dep habarlaıdy QazAqparat tilshisi.

Qurban aıt merekesine oraı, aýdan, qalalardaǵy iri meshitterdiń aýlalaryna kıiz úıler qurylyp, jamaǵatqa dástúrge saı dám usynylady.

Sondaı-aq muqtaj otbasylarǵa jáne Kentaý men Saryaǵash qalalaryndaǵy medrese shákirtterine aıttyq qorjyndar taratylady.

Budan bólek, aqsaqaldar men apalarǵa, balalar úıindegi búldirshinderge aıttyq dastarhany jaıylyp, merekelik shara uıymdastyrylady.

Balalarǵa aıttyq taratylyp, ulttyq oıyndardan jarys ótedi.

Baspasóz máslıhatynda Erjan Tólepov qurban aıt merekesi jaıynda keń kólemdi málimet berip, qurban shalý erejesin túsindirdi.

Foto:Túrkistan óńirlik kommýnıkatsııa ortalyǵy

Al, Túrkistan qalasynyń bas ımamy Muhamedjan Jumadýllaev qurbandyqqa qandaı mal jaramdy ekenin aıtyp, sharýalardy aıt kúnderi mal baǵasyn turaqty ustaýǵa shaqyrdy.

Aıta keteıik,munyń aldynda óńirdegi qasapshylarmen arnaıy jıyn ótip, olarǵa túsindirme jumysy júrgizilgen bolatyn.

Onda maldy sharıǵat talaptaryna saı soıý jáne sanıtarlyq talaptardy saqtaý sekildi máseleler talqylanyp, erejeler túsindirilgen.

Sondaı-aq qala turǵyndary onlaın rejımde qurbandyq shalýǵa múmkindigi bar.

Bul baǵytta qurban shalý rásimin qashyqtan ótkizýge arnalǵan qurban2023.kz saıty jumys isteıdi.