Qurban aıtta syıaqydan qur qalǵan elordalyq turǵyn Tasmaǵambetovke shaǵymdandy
ASTANA. 10 qarasha. QazAqparat - Qurban aı merekesinde syıaqydan shet qalǵan Astanalyq turǵyn qala ákimi Imanǵalı Tasmaǵambetovtyń jeke blogyna hat jazdy.
«Meniń enem «Qazgıdromet» zerthanasynda Astana qalasy boıynsha baqylaýshy bolyp qyzmet isteıdi. Qurban aıt merekesi qarsańynda zerthananyń qyzmetkerlerine syıaqy berildi, bárine birdeı emes, jekelegen adamdarǵa... Al, baqylaýshylar senbi kúni jumys istegen, biraq syıaqy alǵan joq. Osynyń aq-qarasyn aıyrýyńyzdy, adam quqyn aıaqqa basý kórinisterine jol bermeýińizdi ótinemiz», - dep jazǵan Elvıra esimdi turǵyn.
Hatqa jaýap bergen I.Tasmaǵambetov, Qazaqstan Respýblıkasy Eńbek kodeksiniń 126-babynyń talaptaryna sáıkes, qyzmetkerdiń óndiris tıimdiligin arttyryp, jumys sapasyn jaqsartýǵa múddeliligin kúsheıtý maqsatynda jumys berýshi syıaqy berý jáne basqa da yntalandyrý júıesin engize alatyndyǵyn, áıtse de, syıaqy tóleý jumys berýshiniń naqty mindeti bolyp sanalmaıtyndyǵyn atap ótti.
«Alaıda, eger naqty bir derek oryn alǵan bolsa, shara qabyldaý úshin qyzmetker qoldanystaǵy zańdarǵa sáıkes Imanbaeva kóshesindegi 16-úıde ornalasqan Astana qalasy boıynsha Baqylaý jáne áleýmettik qorǵaý departamentine júgine alady, al aty-jóni jazylmaǵan «domalaq aryzdar» qaralmaıdy», - dep túıindedi ákim.
