Qurban aıtta meshitterde túrli qaıyrymdylyq jáne mádenı-sport sharalar uıymdastyrylady - Aqmola oblysy
KÓKShETAÝ. QazAqparat - Qurban aıtta meshitter tarapynan túrli qaıyrymdylyq jáne mádenı-sport sharalar uıymdastyrylady. Bul týraly Qazaqstan musylmandary dinı basqarmasynyń Aqmola oblysyndaǵy ókili, Naýan haziret atyndaǵy Kókshetaý ortalyq meshitiniń bas ımamy Qanat Qydyrmın málim etti.
Oblystyq ishki saıasat basqarmasynyń janyndaǵy óńirlik kommýnıkatsııalar qyzmetiniń májilis zalynda ótken kezdesýde oblystyń bas ımamy aldaǵy kele jatqan qasıetti mereke - Qurban aıt meıramynyń taǵylymy jaıly áńgime qozǵady.
Bıylǵy bir erekshelik, Kókshetaý qalasynda qurban shalatyndar úshin Astanaǵa baratyn joldyń boıynda ornalasqan «Bıjan» jaýapkershiligi shekteýli seriktestigi qyzmet kórsetpek. Qurbanǵa shalynatyn maldy osy jerden satyp alýǵa da bolady. Qurban aıttyń alǵashqy kúni, atap aıtsaq, 12 qyrkúıek kúni tańǵy saǵat 06.30-dan 07.25-ke deıin Naýan haziret meshitinde arnaıy ýaǵyz aıtylady. Aıt namazy aldynda oblys basshylarynyń halyqty quttyqtaýy da kútilýde. Odan ári saǵat 07.30-da Aıt namazy oqylady.
Musylmandar úshin ulyq mereke sanalatyn Qurban aıty tek qurban shalýmen ǵana shektelmeı, meshitter tarapynan túrli qaıyrymdylyq jáne mádenı-sport sharalary da uıymdastyrylmaq.
Atap aıtqanda, Stepnogorsk qalasynyń janyndaǵy Bestóbe kentinde mereke sheńberinde at sporty oıyndary ótkizilmekshi. Osyndaı shara Qorǵaljyn aýdanynda da ótedi dep josparlanǵan. Qurban aıtynyń alǵashqy kúni Naýan haziret meshitinde múgedek balalar men áıelderge arnalyp arnaıy dastarhan jaıylmaq. Ekinshi kúni qaladaǵy joǵary jáne arnaıy orta oqý oryndarynda oqıtyn stýdent jastarǵa dastarhan jaıylý josparlanǵan. Onan ári jastar arasynda túrli oıyndardan saıystar ótkizilmek.
Kezdesý sońynda QMDB-ynyń Aqmola oblysyndaǵy ókili, Naýan haziret atyndaǵy Kókshetaý ortalyq meshitiniń bas ımamy Qanat Qydyrmın jýrnalıster tarapynan qoıylǵan ártúrli saýaldarǵa jaýap berdi.
