Qurban aıtta merekelik rýhty saqtaýǵa tyrysýymyz kerek – QMDB

NUR-SULTAN. QazAqparat – Qazaqstan musylmandary dinı basqarmasy qazaqstandyqtardy karantınge baılanysty engizilgen tyıymdarǵa qaramastan Qurban aıt kúni merekelik rýhty umytpaýǵa shaqyrdy, dep habarlaıdy QazAqparat tilshisi.

«Bıylǵy Qurban aıt meıramy jyldaǵydaı emes. Halyq bir-biriniń úıine aıttap bara almaıdy jáne bazardan mal satyp alyp, qurbandyq shalýyna shekteý qoıyldy. Sondaı-aq, meshitte aıt namazyn oqýǵa tyıym salyndy. Degenmen, azamattarymyz karantınniń kesirinen meshitke bara almadyq, aıttaı almadyq nemese basqa da josparlar iske aspaı qaldy dep qynjylmaýy kerek. Kerisinshe, árqaısymyz óz otbasymyzda osy merekelik rýhty saqtaýǵa tyrysýymyz kerek. Qurban aıtty tańerteń erte turyp namazyn oqyp, duǵa tilep, qulshylyq jasap qarsy alǵan durys. Sonymen qatar, úıdegi jaqyndaryna syılyq alyp berip qýantýǵa da bolady», - deıdi Qazaqstan musylmandary dinı basqarmasy sharıǵat jáne pátýa bólimi meńgerýshisiniń orynbasary Hasan Amanqul.

Onyń aıtýynsha, meshittegi Qurban aıt namazyna jamaǵattyń qaýipsizdigin qamtamasyz etý maqsatynda tyıym salyndy.

«Ózderińiz biletindeı, qurbandyq shalý úshin Qurban2020.kz saıty arqyly onlaın tapsyrys berýge bolady. Іri qara mal bolsa, 7 adamǵa deıin birigip nıettenýge ruqsat. Al qalǵan merekelik dástúrdi otbasymen birge úıde jasaǵany abzal. Odan bólek, qazir HHІ ǵasyr alys-jaqyn aǵaıyn týyspen uıaly telefon arqyly habarlasyp, quttyqtap, ıgi tilekterin aıtý múmkindigi bar. Eń bastysy - kópshilikten sanıtarlyq talaptardy saqtaýyn suraımyz. Onyń ústine bizdiń dinimizge sáıkes adam ózine de, ózge de zııanyn tıgizbeýi kerek. Sol sııaqty, Quran kárimde ózderińdi qaýip-qaterge salmańdar degen aıat bar. Sondyqtan ortaq talapqa moıynsunyp, qonaqqa barýdy, top bolyp shoǵyrlanýdy qoıa turǵanymyz jón», - deıdi ol.