Qurban aıtta mal soıatyn 318 oryn belgilendi - QMDB
ASTANA. QazAqparat - Qazaqstan musylmandary dinı basqarmasynyń aımaqtaǵy ókilderi jergilikti ákimdiktiń laýazymdy qyzmetkerlerimen birlese elimiz boıynsha Qurban aıt kúnderi mal soıatyn arnaıy oryndardy belgiledi, dep habarlaıdy QMDB baspasóz qyzmeti.
Sonymen bıyl elimizde jergilikti meshitter men arnaıy belgilengen 318 orynda mal soıylady. Astanada (8 oryn), Almatyda (21 oryn), Almaty oblysynda (89), Ońtústik Qazaqstan oblysynda (36), Qostanaı oblysynda (20), Pavlodar oblysynda (11), Mańǵystaý oblysynda (8), Shyǵys Qazaqstan oblysynda (23), Batys Qazaqstan oblysynda (13), Qaraǵandy oblysynda (24), Aqtóbe oblysynda (11), Atyraý oblysynda (12), Qyzylorda oblysynda (32), Soltústik Qazaqstan oblysynda (2), Jambyl oblysynda (8) belgilengen qurbandyq shalý oryndarynyń meken-jaıyn, qosymsha málimetterdi jergilikti meshit qyzmetkerlerinen bilýge bolady.
Qurban shalatyn orynnyń tazalyǵyna, sanıtarlyq-epıdemıologııalyq normalar men talaptardyń saqtalýyna mán berilip otyr.
Aıt - aǵaıyn arasyn jaqyndastyra túsetin, adamzat balasyn ımandylyqqa uıytyp, qanaǵat pen táýbege shaqyratyn ulyq meıram. Bul kúnderi barsha musylman qurban shalýmen ǵana emes, Uly Allaǵa unamdy árbir izgi amaly arqyly Rabbysynyń razylyǵyna, raqymyna jaqyndaı túsedi. Óıtkeni, arab tilindegi «qurban» sózi «jaqyn bolý», «jaqyndaý» degen uǵymdardy bildiredi.
Qasıetti Quranda: «Umytpańdar, olardyń eti de, qany da eshqashan Allaǵa jetpeıdi. Oǵan jetetin nárse - júrekterińizge uıalaǵan taqýalyqtaryń (shynaıy nıetteriń)» («Haj» súresi, 37-aıat), - dep baıandalǵan.
Aıta keteıik, bıyl Qurban aıt merekesi 12 qyrkúıekte bastalady. Qurbandyqqa túıe, sıyr jəne qoı (eshki de) shalynady. Qurbandyq malyn aıt namazynan keıin aıttyń úshinshi kúni kún batqanǵa deıin shalýǵa bolady.
Qurbandyq etin úshke bólip, taratady. Bir bóligi ózine qalady, ekinshi bóligi aǵaıyn-týys, kórshilerge beriledi, úshinshi bóligi kómekke muqtaj kisilerge taratylady.
