Qurban aıt - jaqyndasý men rýhanı túleýdiń, yntymaq pen birliktiń merekesi - Qazaqstan halqy Assambleıasy Keńesiniń quttyqtaýy
QazAqparat quttyqtaýdyń mátinin taratady.
Qurmetti otandastar!
Qadirli qaýym!
Qazaqstan halqy Assambleıasy barshańyzdy ulyq meıram - Qurban aıt merekesimen quttyqtaıdy!
Qurban aıt merekesi - adaldyq pen shynaıy yqylas-nıetke negizdelgen aıtýly shara. Ol adam baqyty men jamaǵattyń jaqsylyǵy arasynda úılesim qurǵan, pitir, sadaqa, zeket berý men qoǵamǵa paıdaly, saýaby mol izgilikti, qaıyrly ister jasaý jolynda jarysýǵa shaqyrý arqyly meıirimdilikke tárbıeleıtin áreket.
Bul kúni barsha musylman balasy kirshiksiz aq nıetin pash etip, izgi nıetpen dastarhanyn jaıady, arazdasqandar renishin keshirip, kópshilikpen tize qosyp qulshylyq etedi, qurbandyq shalýǵa, qajylyq saparǵa talpynady. Qurbandyq shalý arqyly adamnyń ishki nıeti, peıili, rýhanı bekemdigi synalady, jomarttyǵy tanylady.
Qurban aıt - jaqyndasý men rýhanı túleýdiń, yntymaq pen birliktiń merekesi. Ol adamı qasıetterdi ardaqtap, adam quqyǵyn aıaqqa taptamaı, ony asqaq ustaýdy nasıhattap, rýhanı tazarýǵa, adamgershilikti ulyqtaýǵa, meıirimdilikke, birine-biri qaıyrymdylyq jasaýǵa shaqyrady, baýyrmaldyqqa jáne birlikke bastaıdy.
Elbasy N.Á. Nazarbaevtyń «Materıaldyq ıgiliktermen eshqandaı baılanyspaıtyn RÝHANIıAT, ADAMGERShІLІK degen daýsyz uly qundylyqtar bar. Olar adam úshin árdaıym basym jáne negiz qalaýshy bolyp qala beredi» - degen sózi bar.
Din - ár adam úshin rýhanı negiz, adamgershilik bastaýy, aqyl-oı parasaty. Ult bar jerde din bar. Barlyq dinniń negizi bir - adamzatty izgilikke bastaý. Ony túsiný, óz ultyńnyń tarıhy qalybynan shyǵyp ketpeı, elikteýge boı urmaı, dildik qasıetińdi diniń arqyly saqtap, ulylyq kórsetý - barshamyzdyń aldymyzda turǵan jaýapty mindet. Ózgeniń senimin joqqa shyǵarmaı, ortaq qoǵamda úılesimdilik ornatý, kórshiniń kóńilin qymbat kórip, birlese beıbit ómir súrý, ádildik pen teńdikti, qoǵamdyq kelisimdi pash etken Ata Zańymyzdy syılaý, kózimizdiń qarashyǵyndaı saqtaý barshamyzdyń paryzymyz.
Qurban aıt, rýhy bıik, jany baı Qazaqstan halqynyń órkenıetti dúnıetanymynyń ónegeli taǵylymy retinde rýhanı bıik adamgershilikti qalyptastyrýdyń merekesi.
Qasıetti Meıram múbárák bolsyn! Barshańyzdyń nıetterińiz qabyl bolsyn!
Qazaqstan halqy Assambleıasynyń Keńesi
