Qurban aıt - ulttar men ulystardy birlik pen ıgilikke, meıirim men keshirimge bastaǵan múbárak meıram - Bas múftı
ASTANA. QazAqparat - Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly barsha qazaqstandyqtardy qasıetti meıram - Qurban aıt kúnimen quttyqtady.
Bas múftı quttyqtaýynda halqymyzdyń san ǵasyrdan bergi sanaly ǵumyrynda rýhanı tirek bolǵan asyl dinimizdegi aıtýly mereke - Qurban aıt meıramyn aıryqsha atap ótip kele jatqany aıtylǵan. Sondaı-aq Erjan qajy Malǵajyuly ulttar men ulystardy birlik pen ıgilikke, meıirim men keshirimge bastaǵan múbárak meıram - Qurban aıt meıramymen quttyqtaıtynyn shyn júrekten jetkizgen.
«Aıt - aǵaıyn arasyn jaqyndastyra túsetin, adamzat balasyn ımandylyqqa uıytyp, qanaǵat pen táýbege úndeıtin ulyq mereke. Bul kúnderi barsha musylman izgi amalymen Allanyń razylyǵyna bólenedi. Aıt kúnderi qasıetti Mekkede qajylyq paryzyn ótep jatqan musylman úmbeti Jaratýshyǵa jalbaryna duǵa jasap, qurbandyq shalady.
Qarjylyq múmkindigi joq adamǵa qurban shalý - mindet emes. Qurbandyq eti aǵaıyn-týys, kórshi-qolań, turmysy tómen otbasylaryna, jetim men jesirlerge, múgedekter men naýqas jandarǵa taratylady. Allanyń razylyǵy úshin qurban shalý - pendeniń ımanyn kúsheıtip, taqýalyǵyn arttyrady. Qasıetti Quranda: «Umytpańdar, olardyń eti de, qany da eshqashan Allaǵa jetpeıdi. Oǵan jetetin nárse - júrekterińizge uıalaǵan taqýalyq, Allaǵa degen qurmet» («Haj» súresi, 37-aıat), - dep baıandalǵan.
Múbárak meıramnyń qurmeti úshin barsha jamaǵatty, azamattardy múgedekter, jetimder men jesirler, ásirese qaraýsyz qalǵan ata-analarǵa qaıyrymdylyq jasaýǵa shaqyramyn.
Alla Taǵala duǵa-tilekterimiz ben izgi amaldarymyzdy jáne shalǵan qurbandyqtarymyzdy qabyl etkeı! Otbasylaryńyzǵa amandyq, myqty densaýlyq, jumystaryńyzǵa bereke tileımin», delingen quttyqtaýda.
