Qurban aıt namazynyń kestesi jarııalandy
ASTANA. KAZINFORM – Qazaqstan musylmandary dinı basqarmasy el óńirlerindegi Qurban aıt namazynyń kestesin jarııalady.
- 6 maýsym – Qurban aıt meıramynyń alǵashqy kúni. Osy kúni oqylatyn Qurban aıt namazynyń elimiz boıynsha ázirlengen kestesin nazarlaryńyzǵa usynamyz, - delingen habarlamada.
Qazaqstan musylmandary dinı basqarmasynyń tóraǵasy Naýryzbaı qajy Taǵanuly bıyl elimizde Qurban aıt merekesi qaı kúni bastalatynyn aıtty.
– Baǵzy zamannan beri Islam dinin rýhanı tiregine aınaldyrǵan halqymyz Qurban aıtty aıryqsha daıyndyqpen qarsy alǵan. Maldyń semizin, jaramdysy men eń jaqsysyn qurbandyqqa shalyp, etin turmysy tómen adamdarǵa taratý, qonaq kútip, úlkenniń batasyn alý, syılyqqa káde berý sekildi amaldar dástúrimizde qalyptasqan izgi qundylyqtar, - dedi Naýryzbaı qajy Taǵanuly.
Bas múftı Qurban aıtqa baılanysty kásipkerlerge úndeý jasady.