Qurban aıt meıramy Nıý-Iorkte resmı mártebege ıe bolady
ASTANA. 23 qazan. QazAqparat - Álemdegi saltanaty asqan sanaýly megapolısterdiń biri Nıý-Iork qalasynyń meri bolýǵa talap qylyp, Demokratııalyq partııa atynan dodaǵa túsken úmitker Bıll de Blazıo Qurban aıt merekesin de demalys jarııalaıtynyn jetkizdi. Hrıstıandardyń Pashasy jáne ıýdeılerdiń Jańa jyly men Pashasy kezinde oqýshylardyń demalatynyn alǵa tartqan ol mer bola qalǵan jaǵdaıda, musylmandardyń da mereıin ústem qylatynyn jetkizdi.
Ol óz sózinde ár adamnyń dinı senimi men quqyǵyna qurmetpen qaraýdy tilge tıek etip, osy joldy mektep qabyrǵasynan bastap qalyptastyrýdy qolǵa alatynyn málimdedi. Osyndaı baǵdarlamalar usynǵan ol saılaýdyń alǵashqy satysynan súrinbeı ótken bolatyn.
Bir qyzyǵy, saılaý nátıjesinde respýblıkalyq partııa ókili jeńiske jetetin bolsa da, Qurban aıt meıramy resmı mereke bolyp jarııalanbaq. Atalmysh partııa ókili Djo Loto da Qurban aıt meıramyna qurmetpen qaraýdy usynyp otyr. «Bul qalada musylmandardyń qatary artyp keledi», - deıdi ol. Nıý-Iork megapolısindegi oqýshylardyń 13 paıyzy ıslam dinin ustanady. Bul týraly muslim.kz habarlady.
