Qurban aıt merekesine oraı 5 kúndik demalys jarııalandy — sheteldegi qazaq baspasózi

Irandyq ınvestor Qazaqstanda maı zaýyty men qus fabrıkasyn salady — Eurasia Today

Irannyń Golrang Industrial Group kompanııasy Qazaqstanda maı óńdeý zaýyty men qus fabrıkasyn salýǵa ınvestıtsııa quıady. Jobalardyń jalpy quny 120 mln AQSh dollaryn quraıdy.

Qazaqstannyń Aýyl sharýashylyǵy vıtse-mınıstri Ermek Kenjehanuly men kompanııa basshysy Fazlı Mehdı Mohammadkarımniń kezdesýi barysynda eki iri jobaǵa qatysty kelisimge qol jetkizildi. Onyń biri — 70 mln dollarlyq maı ekstraktsııalaý zaýyty, ekinshisi — 50 mln dollarlyq zamanaýı qus fabrıkasy.

Bul týraly osy aptada Qyrǵyzstanda shyǵatyn Eurasia Today aqparat agenttigi habarlady.

Atalǵan BAQ-tyń keltirgen derekterine súıensek, maı zaýyty táýligine 3 myń tonnaǵa deıin kúnbaǵys óńdeýge múmkindik berip, otandyq shıkizatty tereń óńdeýdi damytýǵa jáne eksporttyq áleýetti arttyrýǵa baǵyttalady. Al qus fabrıkasy jumyrtqa óndirisin jolǵa qoıyp, ishki naryqty qamtamasyz etýge jáne ónim sapasyn halyqaralyq standarttarǵa jetkizýge múmkindik beredi.

Taraptar bul jobalar Qazaqstannyń agroónerkásip keshenine jańa tehnologııalar tartýǵa jáne ınvestıtsııalyq yntymaqtastyqty kúsheıtýge yqpal etetinin atap ótti. Sondaı-aq 2025 jyly Qazaqstan men Iran arasyndaǵy AÓK salasyndaǵy taýar aınalymy 341 mln dollarǵa jetip, 55,8 paıyzǵa artqany habarlandy.

Qurban aıt merekesine oraı 5 kúndik demalys jarııalandy — CNR

Shyńjań Uıǵyr avtonomııaly ólkelik halyq úkimeti resmı túrde 2026 jylǵy mereke jáne demalys kúnderine qatysty ornalastyrý kestesin jarııalady.

Soǵan sáıkes Qurban aıt merekesi mamyrdyń 27-sine belgilengen.

Atalǵan qujatqa sáıkes, mamyrdyń 27-sinen 31-ine deıin jalpy 5 kún demalys beriledi. Bul aralyqta memlekettik mekemeler men birqatar uıymdarda resmı demalys rejımi saqtalady.

Bul týraly osy aptada Qytaıdyń «Ortalyq halyq radıosy» habarlady.

Qytaılyq BAQ-tyń dereginshe, úkimettiń túsindirýinde bul sheshim dástúrli dinı merekelerdi qurmetteý jáne turǵyndardyń merekeni otbasymen birge ótkizýine jaǵdaı jasaý maqsatynda qabyldanǵany atap ótilgen.

Aıta keteıik, demalys kúnderi óńirde qoǵamdyq qyzmetterdiń úzdiksiz jumysyn qamtamasyz etý úshin kezekshilik tártibi engizilýi múmkin.

Osylaısha, Qurban aıt merekesine baılanysty turǵyndar qatarynan 5 kún demalys alyp, merekeni keń kólemde atap ótýge múmkindik alady.

Tashkentte túrki memleketteriniń sot-quqyqtyq bilim berý forýmy bastaldy — ÓzA

Tashkent qalasyndaǵy «Hilton Tashkent City» qonaqúıinde «Túrki memleketterindegi sot-quqyqtyq bilim berý jáne ádil sot tóreligi: tsıfrlyq transformatsııa jáne ozyq tájirıbelerge ıntegratsııa» taqyrybynda halyqaralyq forým óz jumysyn bastady.

Bul týraly «ÓzA» aqparat agenttigi málimdedi.

Habarlamada aıtylǵandaı, jıynǵa Ázerbaıjan, Qazaqstan, Qyrǵyzstan jáne Túrkııanyń sot-quqyqtyq bilim berý mekemeleri, bas prokýratýra akademııalary, halyqaralyq uıymdar men sarapshylar qatysyp jatyr. Forýmda quqyqtyq bilim berý júıesin jetildirý, sot kadrlaryn daıarlaý sapasyn arttyrý jáne ádil sot tóreligin damytý máseleleri talqylanyp jatyr.

Sondaı-aq jasandy ıntellektti sýdıalardy daıarlaýda qoldaný, tsıfrlyq tehnologııalardy sot-bilim berý úderisine engizý jáne kadr daıarlaý júıesin jańǵyrtý baǵyttary qarastyrylady. Qatysýshylar ózara tájirıbe almasyp, ozyq tájirıbelerdi ortaǵa salady.

Sondaı-aq osy aptada «ÓzA»-da «Tashkent pen Hıýa arasyn joǵary jyldamdyqty poıyz baılanystyrdy» degen taqyryptaǵy aqparat jarııalandy. 

Atalǵan BAQ-tyń dereginshe, Tashkent pen Hıýa qalalary arasynda joǵary jyldamdyqty jańa jolaýshylar poıyzy iske qosyldy. Alǵashqy saparyn «Jalaladdın Máńgiberdi» elektr poıyzy jasap, eldegi kólik ınfraqurylymynyń jańa kezeńin bastady.

Buǵan deıin 1022 shaqyrymdyq jolǵa keminde 14 saǵat qajet bolsa, jańa poıyz bul qashyqtyqty 7,5 saǵatta eńseredi. Saǵatyna 250 shaqyrym jyldamdyqpen júretin zamanaýı quram 389 jolaýshyǵa arnalǵan jáne týrıstik baǵyt retinde de joǵary suranysqa ıe.

Poıyzdyń iske qosylýy óńiraralyq baılanysty kúsheıtip, Samarqand, Buhara jáne Úrgenish sııaqty qalalar arqyly jańa týrıstik aǵym qalyptastyrýǵa múmkindik beredi. 2027 jyldan bastap bul baǵytty Nókis qalasyna deıin uzartý josparlanǵan.

Shyńjańdaǵy Altaı-Qom tasjoly jazǵy qatynas rejımine kóshti — Halyq gazeti

Mamyr aıyna qaraı Shyńjańnyń Altaı taýlary jasyl jelek jamyldy. Qarly taý men jaıqalǵan jaılaý aıasyndaǵy tańǵajaıyp tabıǵaty bar Qom-Qanasqa aparatyn Altaı-Qom tasjoly jazǵy qatynas rejımin resmı túrde bastady, dep habarlaıdy Halyq gazeti basylymy.

Belgili bolǵandaı, jazǵy qatynas rejıminde kólik túrleri men ýaqyt kezeńderi boıynsha naqty basqarý júzege asyrylady. Jeti oryndy jáne odan kem jolaýshylar kólikterine kún saıyn tańǵy 9:30–dan 15:00–ge deıin júrýine ruqsat etiledi.

Altaı-Qom tasjolynyń jalpy uzyndyǵy 209,45 shaqyrym. Bul jol Altaı qalasynan bastalyp, Qanas týrıstik aımaǵyndaǵy Qom aýylynda aıaqtalady. Shyńjańnyń soltústigindegi «Myń shaqyrymdyq galereıanyń» mańyzdy bóligi bola otyryp, tas joly — boıynda orman, shatqal, jaılaý, sazdyq sııaqty ártúrli tabıǵat kórinisterin bir boıyna jıǵan tanymal týrıstik baǵyt.

Aıta keteıik, Qanas týrıstik aımaǵy Qytaıdyń Shyńjań-Uıǵyr avtonomııalyq aýdanyndaǵy eń kórikti tabıǵı mekenderdiń biri sanalady. Ol Altaı taýlary qoınaýynda ornalasqan.

Aımaqtyń basty nysany — Qanas kóli. Jasyl-kógildir tústi kól Qytaıdaǵy eń tereń taý kólderiniń biri bolyp esepteledi jáne tabıǵı sulýlyǵymen tanymal.

Qanas týrıstik aımaǵy Qytaıdyń 5A dárejeli týrıstik aımaǵy mártebesine ıe. Munda jyl saıyn mıllıondaǵan týrıst kelip, orman, alpilik shalǵyndar men taý kórinisterin tamashalaıdy.

Sonymen qatar Qazaqstandaǵy Marqakól qoryǵy men Qanas arasynda transshekaralyq týrıstik baǵyttardy damytý josparlanyp otyr.

Sondaı-aq osy aptada Halyq gazetinde «Qashqarda Qytaı men Ortalyq Azııanyń qurylys materıaldary salasyndaǵy yntymaqtastyq konferentsııasy ótti» degen taqyryptaǵy aqparat jarııalandy. 

Atalǵan BAQ-tyń dereginshe, Qytaıdyń Qashqar qalasynda Shyńjań men Ortalyq Azııa elderiniń úı jıhazdary jáne qurylys materıaldary ónerkásibi boıynsha yntymaqtastyq konferentsııasy ótti. Іs-sharaǵa 400-den astam qonaq, sonyń ishinde salalyq uıymdar, memlekettik organdar jáne jetekshi kásiporyn ókilderi qatysty.

Konferentsııada Qashqardyń geografııalyq artyqshylyqtary men tranzıttik áleýeti atap ótildi. Aımaq «segiz eldi baılanystyratyn bes port jáne Eýropa men Azııany jalǵaıtyn baǵyt» retinde Qytaı men Ortalyq Azııa arasyndaǵy ónerkásiptik baılanystardy damytýda mańyzdy alań ekeni aıtyldy.

Jıynda shekaraaralyq yntymaqtastyqty keńeıtý, qurylys materıaldary men jıhaz óndirisi salasyndaǵy áriptestikti kúsheıtý jáne aımaqtyq ónerkásiptik ıntegratsııany ilgeriletý máseleleri talqylandy.

Zeıinniń sharshaýy: Psıhologııalyq turǵydan qalaı tynyǵýǵa bolady? — TRT

Qazirgi zamanda kóp adam fızıkalyq turǵydan demalyp júrse de, ózin psıhologııalyq turǵydan qajyǵandaı sezinedi. Mamandar muny aqparattyń shamadan tys kóptigi men úzdiksiz sheshim qabyldaýdan týyndaıtyn ıntellektýaldyq sharshaýmen baılanystyrady, dep jazady Túrkııa Radıo Televızııa portaly habarlady.

«TRT»-nyń dereginshe, klınıkalyq psıholog, jazýshy Rabııa ıAvýztiń aıtýynsha, zeıinniń sharshaýy — mıdyń nazar aýdarý, aqparat óńdeý jáne sheshim qabyldaý júıeleriniń shamadan tys júktelýinen paıda bolatyn ýaqytsha kúı. Onyń negizgi belgilerine zeıinniń shashyraýy, umytshaqtyq jáne sheshim qabyldaýdyń qıyndaýy jatady.

Maman qazirgi adamnyń kúndelikti ómiri úzdiksiz aqparat aǵynymen tyǵyz baılanysty ekenin aıtady. Áleýmettik jeliler, elektrondy hattar men turaqty habarlamalar mıdy únemi belsendi kúıde ustap, zeıinniń tolyq tynyǵýyna múmkindik bermeıdi. Sonyń saldarynan adam tynyshtyqta da mazasyzdyq sezinýi múmkin.

Rabııa ıAvýzdyń pikirinshe, psıhologııalyq turǵydan tynyǵý tek fızıkalyq demalyspen shektelmeıdi. Ol úshin adam aqparat aǵynyn azaıtyp, tsıfrlyq qurylǵylardan ýaqytsha alystaýy qajet. Tabıǵat aıasynda serýendeý, tynys alý jattyǵýlary, josparsyz ýaqyt ótkizý jáne dál qazirgi sátke nazar aýdarý zeıindi qalpyna keltirýge kómektesedi.

Sondaı-aq maman tym josparlanǵan demalystyń da zeıindi sharshatýy múmkin ekenin atap ótti. Onyń aıtýynsha, ıntellektýaldyq tynyǵý sheshim qabyldaý sanyn azaıtyp, mıdyń «bos keńistikke» ıe bolýyna múmkindik berý arqyly júzege asady.

Psıholog ıntellektýaldyq densaýlyqty uzaq ýaqyt elemeý kúızelis sındromyna, jadynyń álsireýine jáne sheshim qabyldaý qabiletiniń tómendeýine alyp kelýi múmkin ekenin eskertti. Osyǵan baılanysty ol kúndelikti ómirde ekran ýaqytyn qysqartýǵa, tabıǵatpen kóbirek baılanys ornatýǵa jáne sanaly túrde tynyǵýǵa kóńil bólýge keńes beredi.

Sonymen qatar osy aptada TRT basylymynda «Jattyǵý aǵzanyń barlyq júıesine paıdaly» degen mazmundaǵy shaǵyn maqala jaryq kórdi. 

Ǵylymı zertteýler bulshyqetterdiń tek qozǵalysqa jaýap beretin tin emes, búkil aǵzaǵa áser etetin endokrındik organ ekenin kórsetedi. Mamandardyń aıtýynsha, jattyǵý kezinde bólinetin mıokınder mı, ımmýndyq júıe, baýyr jáne súıektermen baılanys ornatyp, aǵzanyń ishki tepe-teńdigin saqtaýǵa kómektesedi.

Zertteýlerge sáıkes, ınterleıkın-6 (IL-6), ırızın jáne BDNF sekildi molekýlalar qabynýdy azaıtyp, maı men qant almasýyn retteıdi, sondaı-aq este saqtaý qabileti men kognıtıvti fýnktsııalardy jaqsartady. Sonymen birge dene belsendiligi ımmýndyq júıeni kúsheıtip, 2-tıpti dıabet pen júrek-qan tamyrlary aýrýlarynyń aldyn alýǵa yqpal etedi.

Mamandar turaqty qozǵalystyń súıek tyǵyzdyǵyn arttyryp, emotsıonaldyq saýlyqqa oń áser etetinin aıtady. Keıbir ǵylymı zertteýler jattyǵý kezinde bólinetin mıokınderdiń qaterli isik jasýshalarynyń taralýyn tejeýge kómektesýi múmkin ekenin kórsetken.