Qurban aıt merekesinde Qaraǵandy oblysynda 1500-ge jýyq mal qurbandyqqa shalyndy
Soıylǵan mal eti 3 myńnan astam muqtaj otbasylarǵa taratyldy, sonymen qatar 4 mln. 211 myń teńge somasyna azyq-túlik qorjyndary tabystaldy, dep habarlaıdy QazAqparat tilshisi.
Bıylǵy jyly karantın jaǵdaıynda Qurban aıt rásimin ótkizý boıynsha birqatar is-sharalar pysyqtaldy.
Qaraǵandy oblysynyń bas memlekettik sanıtarııa dárigeriniń 2020 jylǵy 29 shildedegi № 32-q «Qaraǵandy oblysy aýmaǵynda Qurban aıt merekesi kúnderi koronovırýstyq ınfektsııasynyń taralýyna yqpal etýshi is-sharalardy ótkizýge tyıym salý týraly» qaýlysy qabyldanyp, osy qaýlyǵa sáıkes is-sharalar qabyldandy.
Oblys aýmaǵynda 243 meshit qyzmetin atqarady. Qalalyq ákimdikter men meshit ókilderi arasyndaǵy kelisim boıynsha mal soıatyn oryndardy daıyndaý jáne qajetti quraldarmen jabdyqtaý jumystary pysyqtaldy, sondaı-aq bekitilmegen oryndarda qurbandyq shalýǵa jol bermeý týraly tapsyrmalar ákimdikterdiń erekshe baqylaýyna alyndy.
Qaraǵandy oblysynda barlyq qalalar men aýdandarda 18 mal soıý orny anyqtaldy, onyń ishinde 51 mal etin saqtaıtyn tońazytqysh, 79 mal etin taratatyn kólik daıyndaldy. Qurbandyqqa shalynǵan maldyń etin 93 qasapshy bólip, óńdedi. Al 200-den astam erikti mal etin taratýmen aınalysty. Bul jumystardyń barlyǵyn tekserý maqsatynda tıisti jaýapty polıtsııa, veterınarııa qyzmetkerleri, sanıtarlyq dárigerler sekildi mamandar bekitildi. Jumystar kórsetilgen algorıtm boıynsha júrip jatyr.
Buqaralyq aqparat quraldarynyń qatysýymen brıfıng ótkizilip, turǵyndar arasynda aýqymdy túsindirý jumystary jasaldy. Oblystyq bas memlekettik sanıtarııa dárigeriniń, Oblystyq ortalyq meshitiniń bas ımamy Ómirzaq Bekqojanyń qatysýymen «Saryarqa» telearnasynda «Qurban aıt» merekesin ótkizýine baılanysty brıfıng ótkizildi. Sonymen qatar «Pervyı Karagandınskıı», «5 kanal», «Life 09» telearnalarynda suhbat berildi. Onlaın túrdegi qurban shalý týraly arnaıy rolıkter men aqparattyq ınfografıkalar halyq arasynda keńinen taratyldy. Áleýmettik jeliler arqyly meshit ımamdary men aqsaqaldar bıylǵy jyly «Qurban aıt» qurbandyq shalýdyń erekshe rásiminiń tártibi týraly túsiniktemeleri jarııalandy.
Búgingi kúni «Qurban2020.muftyat.kz» arnaıy saıtyna 240 tapsyrys kelip tústi (onyń ishinde 140 tólem jasaldy), sondaı-aq muqtaj jandardyń 358 ótinishi qabyldandy. 1439 mal (69 sıyr, 1370 qoı) qurbandyqqa shalyndy, qazirgi ýaqytta mal eti 3230 muqtaj otbasylarǵa taratyldy, sonymen qatar jalpy 4 mln. 211 myń teńge somasyna azyq-túlik qorjyndary tabystaldy.
