Qurban aıt merekesinde qandaı sanıtarııa talaptaryn saqtaý kerek
Spıker Qurban aıtty merekeleý kezinde mal soıý jáne satý pýnkterinde sanıtarııalyq normalardy saqtaý qajettigin aıtty.
«Mal satý men soıý jumysyn veterınarııalyq qyzmettiń ruqsatymen árbir aýyl sharýashylyǵy janýaryna tıisti veterınarııalyq qujaty bar oryndarda jasaý qajet. Mal soıýdan keıin qaldyqtardy ýaqtyly zararsyzdandyrý jáne shyǵarý, jeke gıgıena erejelerin qatań saqtaý qajet», - dedi Gaýhar Katkenova.
Onyń aıtýynsha, qazirgi ýaqytta qalada jedel ishek ınfektsııasy aýrýlary jıi tirkelýde.
Osyǵan baılanysty qoǵamdyq tamaqtaný oryndary men meshitte is-shara ótkizý kezinde birqatar erejelerge erekshe nazar aýdarý kerek.
«Tamaqtaný obektileriniń qyzmetkerlerinde medıtsınalyq tekserýler men medıtsınalyq kitapshalar bolýy kerek, arnaıy kıim kıip tamaq daıyndaý, dárethanaǵa barar aldynda arnaıy kıimdi sheshý, tamaq daıyndaýdy, taratýdy júzege asyratyn jumyskerler denesiniń ashyq jerlerin tekseretin jaýapty adamdy anyqtaý, irińdi jaralar, qolynda usaq jaraqattar anyqtalǵan jaǵdaıda olardy jumystan shettetý, tazalyqpen aınalysatyn adamdardy tamaq daıyndaýǵa jáne ydys jýýǵa jibermeý, tamaq daıyndaý tehnologııasyn saqtaý, daıyn ónim úshin shıki etke arnalǵan kesý taqtalaryn, pyshaqtardy, ydystardy paıdalanbaý kerek, tez buzylatyn taǵamdardy tutynýdan saq bolyńyz, azyq-túlik ónimderin tońazytqyshta taýarlyq kórshilikti eskere otyryp saqtańyz (shıki ónimder men daıyn ónimderdi bir sórede saqtaýǵa bolmaıdy), ónimderdiń sapasy men qaýipsizdigin rastaıtyn qujattar bolý kerek, kezdeısoq adamdardan nemese ruqsat etilmegen saýda oryndarynan azyq-túlik satyp almaǵan jón», - dedi Almaty qalasynyń sanıtarıalyq-epıdemıologııalyq baqylaý departamenti basshynyń orynbasary Gaýhar Katkenova.
Eske salaıyq, Qazaqstan musylmandary dinı basqarmasynyń baspasóz hatshysy Aǵabek Qonarbaıuly jelidegi paraqshasynda Qazaqstanda Qurban aıt merekesi 28 maýsymda bastalatynyn jazǵan bolatyn.
