Qurban aıt kúnderi Qazaqstannyń Islam Yntymaqtastyǵy Uıymyna tóraǵalyǵyn abyroımen atqarǵanyn maqtanyshpen aıta alamyz - Qaırat Lama Sharıf
ASTANA. 26 qazan. QazAqparat - QR Din isteri agenttiginiń tóraǵasy Qaırat Lama Sharıf Qazaqstannyń barlyq musylmandaryn Islam dinindegi basty meıram - Qurban aıtymen quttyqtady,
dep habarlady atalmysh agenttiktiń baspasóz qyzmeti.
"Qasıetti Quran kárim kitabynda «qandaı jaqsylyq jasasań da, aldymen ata-anańa, týǵan-týysqandaryńa, jetim men músápirlerge jáne jolaýshylarǵa jasa! Alla taǵala barlyq ıgi isterińdi biledi», - delingen. Osy merekede aıtqan duǵa-tilekterińiz, saýapty isterińiz qabyl bolsyn.
Nurly meıram qarsańynda keń baıtaq Qazaqstan jerinde 2228 meshit qaıta tirkeýden ótti. Meshitterdiń sany jaǵynan Qazaqstan kórshi baýyrlas elder arasynda kósh bastaýda. Bizdiń derekter boıynsha, Ózbekstanda 2050 meshit, Ázirbaıjanda 1700 meshit, Qyrǵyzstanda 2200 meshit, Túrkmenstanda 400 meshit bar.
Sonymen qatar álemniń 1,5 mıllıardtan astam musylmandary toılap jatqan Qurban aıt kúnderi Qazaqstan dúnıejúzinde Birikken Ulttar Uıymynan keıin ekinshi oryn alatyn Islam Yntymaqtastyǵy Uıymyna tóraǵalyǵyn da abyroımen atqarǵanyn maqtanyshpen aıta alamyz, delingen quttyqtaýda.
