Qurban aıt kezinde qandaı saqtyq sharalaryn este ustaǵan jón — dáriger keńesi
ALMATY. KAZINFORM — Aldaǵy demalys kúni barsha musylman úshin qasıetti Qurban aıt merekesi bastalady. Osy oraıda Almaty sanıtarııalyq-epıdemıologııalyq baqylaý departamenti basshysynyń orynbasary Gaýhar Katkenova qurban shalý kezinde qatań saqtyq sharalaryn saqtaý qajettigin eskertti.
— Qasıetti Qurban aıt merekesi qarsańynda musylman qaýymynyń basy qosylyp, úı jaǵdaıynda, meshitte nemese qoǵamdyq tamaqtaný oryndarynda «qudaıy tamaq» beriledi. Osyndaı is-sharalardy ótkizý barysynda asa qaýipti juqpaly aýrýlardyń, jappaı tamaqtan ýlaný jáne jedel ishek ınfektsııalarynyń aldyn alý maqsatynda Almaty qalasynyń sanıtarııalyq dárigerleri sanıtarlyq talaptardy saqtaýdy usynady, — dedi Gaýhar Katkenova.
Qurban aıt kezindegi talaptar:
Mal satý, soıý beketterinde:
— qurbandyqqa shalynatyn maldardy satý men soıýdy arnaıy oryndarda jáne árbir janýarlardyń tıisti veterınarlyq qujattary (veterınarlyq pasport, qulaq syrǵalary) bolǵan jaǵdaıda ǵana iske asyrý;
— mal soıý oryndarynda sanıtarııalyq-epıdemıologııalyq talaptardyń qatań saqtaý (aýyz sý, las sý júıeleriniń bolýy), mal soıý barysynda shyqqan qaldyqtardy ýaqtyly zalalsyzdandyrylyp, shyǵarý;
— qyzmetkerlerdiń medıtsınalyq tekserýden ótýi jáne medıtsınalyq kitapshalarynyń bolýy, jeke bas gıgıenasyn saqtaý qajet.
Úı jaǵdaıynda:
— qonaqtardyń qol jýýyna jaǵdaıdyń bolýy;
— tamaqtaný bólmeleriniń aýasyn jıi tazartý;
— shıkizat pen tamaq ónimderin qaýipsizdigin kýálandyratyn taýardyń ilespe qujattamasy bar oryndardan satyp alý;
— úı jaǵdaıynda daıyndalǵan konservi (salattar, et, qus, balyq, sańyraýqulaq jáne t. b.) ónimderin paıdalanar aldynda 15-20 mınýt termııalyq óńdeýden ótkizý;
— et, qus, jumyrtqadan tez buzylatyn taǵamdar, sondaı-aq pashtetter, aspazdyq ónimder, kremi bar kondıterlik ónimder, salattardy daıyndaǵannan keıin birden qoldaný qajet, saqtaý talaby buzylsa, kelesi kúni paıdalanbaǵan jón.
Almatynyń sanıtar dárigerleri joǵaryda atalǵan talaptardy saqtamaý halyq arasynda tamaqtan ýlaný, asa qaýipti jáne jiti ishek ınfektsııalarynyń paıda bolýyna yqpal etýi múmkin ekenin eske salady.
