Qurban aıt qarsańynda Qaraǵandyda mal soıý oryndaryna tegin avtobýs qatynaıdy
QARAǴANDY. QazAqparat - 31 tamyz kúni Qurban aıt merekesi qarsańynda turǵyndardyń qurbandyqqa shalatyn maldaryn soıý ornyna jetkizý arnaıy tegin avtobýstar júredi, dep habarlaıdy «QazAqparat» HAA tilshisi.
Oblystyq ortalyq meshit pen qalalyq №1 meshitinen Respýblıka dańǵyly, 72/1 mekenjaıynda ornalasqan mal soıý ornyna deıin eki avtobýs barady. Bul avtobýstarda júrý tegin. Qaraǵandy oblysy din isteri jónindegi basqarmanyń bas mamany Qaısar Aqparovtyń málimetinshe, mal soıý orny - burynǵy «Tulpar» JShS avtobazary mańynda.
«Alańda bir ýaqytta birneshe adamnyń bir-birine esh kedergisiz qurbandyq shalýyna jaǵdaı jasalǵan. Aýmaǵy shamamen 30 gektar jerdi qamtıdy. Mal soıý orny veterınarlyq jáne sanıtarlyq talaptarǵa tolyqtaı saı - ortalyqtandyrylǵan sý jáne sanıtarlyq toraptarmen jabdyqtalǵan», - dedi Qaısar Aqparov.
