Qurban aıt-2026: Ortalyq Azııa elderinde qoı baǵasy qansha
ASTANA. KAZINFORM – Qurban aıt qarsańynda dástúrli túrde Ortalyq Azııa elderinde qurbandyqqa shalynatyn qoıǵa suranys artady. Tıisinshe mal baǵasy da qymbattaı túsedi.
Qoıdyń quny onyń tuqymyna, salmaǵyna, jasyna, qońdylyǵyna jáne satylatyn óńirine baılanysty ózgerip otyrady.
Ózbekstanda qoı baǵasy orta eseppen 5-6 mıllıon sýmǵa jetedi (shamamen 197-236 myń teńge).
Qyrǵyzstanda qurbandyqqa shalynatyn jas toqty 18-25 myń somǵa (97-138 myń teńge) satylady. Al úlkenirek qoılardyń baǵasy 28-35 myń somǵa deıin jetedi (154-193 myń teńge).
Tájikstanda bir qoıdyń ortasha baǵasy – 3,5-5 myń somonı aralyǵynda (182-260 myń teńge).
Al Túrikmenstandaǵy qurbandyqqa arnalǵan qoılardyń bıylǵy baǵasy týraly ashyq aqparat jarııalanbaǵan.
Óz kezeginde Qazaqstanda qoı baǵasy óńirlerge qaraı aıtarlyqtaı ózgerip otyrady. El boıynsha eń arzan jáne eń qymbat baǵa arasyndaǵy aıyrmashylyq 140 myń teńgege deıin jetedi.
Qazirgi ýaqytta eń arzan qoılar Aqtóbe, Qaraǵandy, Oral jáne Shymkent qalalarynda satylyp jatyr. Bul óńirlerde qoı baǵasy 60 myń teńgeden bastalady.
Al eń joǵary baǵa Túrkistan qalasynda tirkeldi. Munda qoı baǵasy 70 myńnan 200 myń teńgege deıin barady. Satýshylar muny mereke kúnderi suranystyń artýymen, sondaı-aq maldyń salmaǵy, tuqymy jáne kútim jaǵdaıymen baılanystyrady.
Aıta keteıik, Astanada Qurban aıt kezinde maldy aýlada soıýǵa tyıym salynady.
Bas múftı Naýryzbaı qajy Taǵanuly Qurban aıt — tek dinı meıram emes, sondaı-aq qoǵamnyń birligin nyǵaıtatyn, azamattar arasyndaǵy ózara janashyrlyqty arttyratyn mereke ekenin aıtty.
