Qurannyń qoljazbasynyń quny sharyqtap tur
ASTANA. 25 qazan. QazAqparat - Mamandardyń esebinshe, bul qoljazbanyń jazylǵanyna kem degende eki ǵasyr ýaqyt ótken. Qasıetti Qurannyń qundy qoljazbasyn Ostroj murajaı qoryǵynyń qyzmetkerleri tapqan eken. Qasıetti jádiger qashan ǵalymdar nazaryna túskenshe osy jerde jıyrma jylǵa jýyq ýaqyt boıy zerttelmeı jatqan, dep habarlaıdy muslim.kz.
Sarapshylardyń qoljazbany zertteý jumystaryna jylǵa jýyq ýaqyt ketken. Qoljazbadaǵy shúberek paraqtarǵa qasıetti mátin qyzyl qońyr tústi sııamen jazylǵan. Onyń keıbir betteri jıi paraqtalǵannan, jyrtylýdyń az-aq aldynda tur.
Qundy jádigerdiń «jasyn» anyqtaǵan ónertanýshy Nıkolaı Bendıýktiń aıtýynsha, bul eńbektiń jazylýy 18-shi ǵasyrdyń sońy men 19-shy ǵasyrdyń bas kezine tıesili.
Al, shyǵystanýshy Mıhaıl ıAkýbovıch mundaı jádigerdiń Batys Ýkraınada tuńǵysh ret tabylǵanyn aıtady. Qasıetti Quran qoljazbasynyń quny ondaǵan myń grıvenge sharyqtap turǵan kórinedi qazir. Qoljazbanyń betteri túgel: 114 súre tolyq qamtylǵan.
