Qurandy órteý aktsııasyna narazylyq bildirgen halyq Aýǵanstandaǵy NATO bazasyna tas laqtyrdy
ASTANA. Qyrkúıektiń 11-i. QazAqparat - Qyrkúıektiń 11-inde Qurandy órteý týraly amerıkandyq pastordyń ıdeıasyna narazylyq bildirgen birneshe myńdaǵan adam Aýǵanstanda NATO bazasynyń aldyna jınaldy. Aktsııa barysynda tártipsizdikter oryn alyp, halyq kúzetshilermen qaqtyǵysty.
Sky News agenttiginiń aqparaty boıynsha, birneshe demonstrant atyp óltirildi, 11 adam jaraqat aldy.
Derekkózderdiń habarlaýynsha, narazylyq aktsııasyna qatysýshylar Badahshan provıntsııasynda nemis áskerıleri ornalasqan NATO bazasyna tas laqtyrǵan. Ýálaıat gýbernatory ókiliniń Reuters agenttigine habarlaýynsha, narazylyq sharasyna shamamen 10 myńdaı adam qatysqan.
Aýǵandyqtar amerıkandyq pastordyń Qurandy órteý ıdeıasynan bas tartqanynan beıhabar bolsa kerek. Óz prıhodyna kelýshilerdi qyrkúıektiń 11-inde Qurannyń kóshirmesin órteýge shaqyrǵan florıdalyq pastor Terrı Djons bul oıynan bas tartqanyn, QazAqparat budan buryn habarlaǵan bolatyn.
Dove World Outreach Center shirkeýi pastorynyń aıtýynsha, Nıý-Iorktegi jańa meshittiń lańkester joıǵan Dúnıejúzilik saýda ortalyǵy munaralarynan qashyqtaý salynatyndyǵy týraly oǵan ýáde berilgennen keıin, ol erteńge josparlanǵan aktsııadan bas tartqan-mys. Biraq, máseleniń shyn máninde solaı-solaı emestigi belgisiz.
Pastordyń bul ıdeıasy bastapqyda álem musylmandarynyń úlken narazylyǵyn týǵyzdy; AQSh ókimeti men Vatıkan da ony aıyptady. Interpol, Qurandy órteý aktsııasy dúnıejúzi boıynsha lańkestik belsendilikti órshitetinin málim etti, dep habarlaıdy Lenta.ru saıty.
