Qurandy kelemejdegen fılmniń kórsetilýine tyıym salyndy
ASTANA. 27 qańtar. QazAqparat - Úndistannyń Tamıl Nadý shtatynyń bıligi Bollıvýd túsirgen «Vıshvarýpam» atty fılmdi tyıym saldy. muslim.kz saıtynyń jazýynsha, buǵan ıslam uıymdary sebep boldy. Musylman jetekshileriniń aıtýynsha, atalmysh fılmde Qurannyń mańyzy joqqa shyǵarylyp, kúlki quralyna aınaldyrylǵan.
«Bas mınıstr bul fılmniń shtattaǵy tynyshtyq pen turaqtylyqtyń irgesin shaıqaltyp, dúrbeleń týdyratynyn eskerip, joǵary laýazymdy sheneýnikterdiń keńesine júgingen», - dedi sheneýnikterdiń biri Times of India-ǵa bergen suhbatynda.
«Fılmdi eki apta boıy kórsetpeý týraly sheshim qabyldandy», - dedi sózin ary sabaqtap.
Úkimet Paıǵambarymyz Muhammed Mustafanyń (s.a.s.) týǵan kúnine oraı fılmniń kórsetilýine tyıym saldy.
Musylmandardyń jetekshileri fılm prodıýserin biraýyzdan aıyptady. Sondaı-aq, olar úndi kınomatografııasynyń tarıhynda mundaı bassyzdyqqa buryn-sońdy eshkimniń barmaǵanyn tilge tıek etti.
Shtattyń qoǵam qaıratkerleri rejısser Kamal Hasannyń bul fılmi musylmandar men ındýstar ejelden tatý turatyn Tamıl Nadýdaǵy áleýmettik teńdikke syna qaǵyp, syzat túsiretinin aıtyp otyr.
