Qurandy órtegen Momıka óz úıinde oqqa ushty

ASTANA. KAZINFORM – 2023 jyly Shvetsııa astanasynda birneshe dúrkin Qurandy órtep, musylman elderiniń narazylyǵyn týdyrǵan er adam sot úkimi shyǵýdan bir kún buryn oqqa ushty.

Jergilikti polıtsııa osy qylmysqa qatysy bar bes adamdy qamaýǵa aldy. Bul týraly sıngapýrlyq Lianhe Zaobao basylymy habarlady.

Shvetsııa polıtsııasy búgin Iraktan qonys aýdarǵan Salvan Momıkanyń sársenbi kúni (29 qańtar) Sedertele qalasyndaǵy óz úıinde atyp óltirilgenin rastady.

Basylymnyń jazýynsha, polıtsııa kisi óltirý baby boıynsha tergeý júrgizip, bes adamdy túndelete qamaýǵa alǵan.

Stokgolm soty beısenbi kúni Salvan Momıkanyń Qurandy órteýiniń «násildik óshpendilikti qozdyrýǵa» qatysy jaıly úkim shyǵarady dep josparlanǵan edi. Alaıda, sot úkim shyǵarýdy 3 aqpanǵa qaldyrdy.

2023 jyldyń maýsym aıynda Salvan Momıka Stokgolmdegi Úlken meshittiń aldynda 200-ge jýyq adamnyń kózinshe Qurannyń julynǵan paraqtaryn tabanyna taptap, órtep jiberedi. Onyń bul áreketi Túrkııa, Irak sııaqty eldermen Shvetsııa arasyndaǵy qarym-qatynastyń shıelenisýine sebep bolǵan edi.

Іsty qaraǵan prokýrordyń aıtýynsha, Shvetsııa zańdaryna sáıkes Qurandy órteý ıslam dinine syn retinde qarastyrylyp, sóz bostandyǵy aıasynda qorǵalýy múmkin. Alaıda, oqıǵanyń naqty mán-jaıyna jáne Momıkanyń Qurandy órteý kezinde aıtqan sózderine baılanysty bul áreket «belgili bir etnostyq topqa qarsy óshpendilikti qozdyrý» retinde baǵalanýy da múmkin.

Stokgolmda shvedtik belsendi Qurandy órtegenin jazǵan bolatynbyz.

Dúnıejúzilik musylmandar qaýymynyń keńesi Shvetsııada Quran kitaptyń órtelýin synady.