Quran úkimine qulaq asaıyq - hanzada Ýelskıı
ASTANA. 14 qarasha. QazAqparat - Londonda ótken Búkil álemdik ıslamı ekonomıkalyq forýmda hanzada Ýelskıı Charlz ıslam qarjy júıesi men onyń mańyzy jaıly baıandama jasady.
Ol óz sózinde ıslam qarjy júıesiniń ózegindegi rýhanı qundylyqtardy joǵary baǵalaıtynyn ári osy kúngi balamaly júıeni almastyra alatynyn jetkizdi, dep jazady muslim.kz.
«Meni ıslam qarjysynyń naqty ekonomıkaǵa basa mán beretini ári ádep pen moraldyq qundylyqtardan aýytqymaıtyny qýantady. Biz jáne bizden keıingi urpaq, baılar men kedeıler, qarjylyq uıymdar men qoǵam arasynda ádil bólýdi júzege asyra alatyn qarjylyq ári bıznes úlgisi bolýy múmkin be? Meni qyzyqtyratyny - sol»,- dedi ol qyzyna sóılep.
«Eger búgingi ekonomıkany keńinen jaılaǵan ósimge qarsy Quran úkimine qulaq asatyn bolsaq, Jerdiń tabıǵı kapıtalyn taýysý arqyly keler urpaqqa qaldyrǵan qaryzymyz ósimqorlyq pen tyıym salynǵan áreket bolyp tabylar edi»,- dedi ol ashyǵyn aıtyp.
«Sol sebepti de, Islam dininiń erejesine sáıkes jumys isteıtin uıymdar men kásiporyndar ádildiktiń ornaýyna, kásipkerlik qyzmet pen qarjylyq turaqtylyqty qamtamasyz etýge septigin tıgizetin ádepti tásildi qalyptastyrýǵa kómekteser edi», - dedi ol sóziniń sońynda.
