Quran oqýdan ótken jarysta 14 jastaǵy qarı «Hyundai» avtokóligin jeńip aldy (FOTO)
ALMATY. QazAqparat - Búgin Almaty qalasynda «Báıken» meshitinde Qazaqstan musylmandary dinı basqarmasynyń uıymdastyrýymen ótken «VI Respýblıkalyq Quran Kárimdi jatqa oqý baıqaýy» máresine jetti.
Qurannyń 30 parasyn, ıaǵnı qasıetti kitabymyzdaǵy 114 súreni tolyq jattaǵan qarılar saıysqa túsken bolatyn. Ár oblystaǵy irikteý synynan ótken 32 qarıdyń Qurandy múltiksiz jattaýy, Quran oqý erejelerin saqtaýy, aıattardyń tápsirin meńgerýi, súrelerdiń aýdarmasyn bilýi syndy qabiletterin uıymdastyrý alqasy, ıaǵnı ádilqazylar jan-jaqty baǵalady, saralady.
Osymen altynshy ret ótken respýblıkalyq Quran oqýdan jarysta Jambyl oblysynan kelgen 14 jastaǵy eń jas qarı Dýlat Qalyǵulov júldeli І oryndy ıelendi. Bas múftı Erjan qajy Malǵajyuly oǵan «Hyundai» kóliginiń kiltin saltanatty túrde tabystady.
Ádilqazylar alqasynyń sheshimimen Shoqan Ýálıev (Ońtústik Qazaqstan oblysy) qarıǵa ekinshi oryn buıyrdy. ІІ orynnyń júldesi - «Daewoo Nexia» avtokóligi. ІІІ orynǵa laıyq bolǵan Hýseı Ýalıhadjı qarı (Jambyl oblysy) «Lada Prıora» kóligin qanjyǵasyna baılady. IV oryndy ıelengen Naǵım Naǵmanov qarıǵa (Mańǵystaý oblysy) úlken qajylyqqa tegin joldama berildi. V orynǵa Nazar Sultanbaı qarıǵa (Astana qalasy) kishi qajylyqtyń sertıfıkaty tabystaldy. Jarysqa qatysqan barlyq qarıǵa 70 000 teńge qarjylaı syılyq berildi.
Igi sharada «Báıken» meshitiniń Bas ımamy Qulmuhammed Mahanbet júldeli oryndarǵa kólik syılaǵan demeýshilerge, qarjylaı qoldaý kórsetken din janashyrlaryna, kásipkerlerge, uıymdastyrý alqasynyń múshelerine izgi nıetin jetkizip, Bas múftıdiń alǵys hatymen marapattady.
