Quramynda qazaqstandyq fýtbolshy oınaıtyn TsSKA Reseı chempıonatynda kósh bastady
NUR-SULTAN. QazAqparat – Quramynda qazaqstandyq fýtbolshy Baktıer Zaınýtdınov oınaıtyn TsSKA Reseı chempıonatynda kósh bastady, dep habarlaıdy QazAqparat tilshisi.
Máskeýlikter 13-týrda Volgogradta premer-lıgaǵa bıyl qosylyp, 15-orynda kele jatqan «Rotormen» kezdesti.
Bul oıynda ıslandııalyq Arnor Sıgýrdssonnan pas alǵan Alan Dzagoev 41-mınýtta jeńis golyn soqty. A.Dzagoev matchtyń úzdik oıynshysy atandy.
Toqsan mınýt boıy alańda júrgen B.Zaınýtdınov ta jeńiske úles qosty.
Baktıer Zaınýtdınovtyń el quramasynda jartylaı qorǵanys shebinde oınaıtyny belgili. Degenmen TsSKA bapkeri Vıktor Gancharenko Baktıerdi qorǵanys shebine qoıyp júr.
Sonymen qatar B.Zaınýtdınov Eýropa lıgasynda eki oıyn ótkizip úlgerdi. TsSKA syrt alańda aýstrııalyq «Volfsbergpen» (1:1), sosyn Máskeýde Zagrebtiń «Dınamosymen» (0:0) teń tarqasty. Endi 5 qarashada Nıderlandyda «Feıenoord» komandasymen alańǵa shyǵady.
Bul týrdan keıin 28 upaı jınaǵan TsSKA premer-lıgada birinshi orynǵa kóterildi. Al máskeýlik «Spartak» óz alańynda kútpegen jerden B.Zaınýtdınovtyń burynǵy komandasy «Rostovtan» 0:1 esebimen utylyp qaldy. Sankt-Peterbýrgtiń «Zenıti» syrt alańda «Hımkıdi» 2:0 esebimen qapy qaldyrdy. «Hımkı» quramynda Qazaqstan quramasynyń taǵy bir jartylaı qorǵaýshysy Islambek Qýat bolǵanymen, ony bapkerler oıynǵa qosyp júrgen joq. 27 upaımen «Zenıt» pen «Spartak» ekinshi, úshinshi orynda keledi.
Eske sala keteıik, budan buryn B.Zaınýtdınovtiń qyrkúıek aıynyń qorytyndysy boıynsha TsSKA komandasynyń úzdik oıynshysy atanǵanyn, K.Ronaldýdyń karantınnen keıin qos gol soqqanyn jazǵan bolatynbyz.