Quramynda qant bar sýsyn óndirýshiler memleketten aktsız engizbeýdi surady
Aıta keteıik, 2021 jyldyń 12 qazanynda «Salaýatty ult» ulttyq jobasy bekitildi, onyń sheńberinde 2023 jyldan bastap 2023 jyly 20%, 2024 jyly 35%, 2025 jyly 45% mólsherlemelermen qant qosylǵan sýsyndarǵa aktsız engizý boıynsha is-shara kózdelgen.
Osyǵan baılanysty Qazaqstandaǵy alkogolsiz sýsyndar men shyryndar óndirýshileriniń qaýymdastyǵyna kiretin alkogolsiz sýsyndardyń toǵyz jetekshi óndirýshileri men ımporttaýshylary «Erikti mindettemeler kodeksine» qol qoıdy. Kompanııalar 2026 jyldyń sońyna deıin barlyq qatysýshylardyń shoǵyrlandyrylǵan sýsyndar portfolıosyndaǵy qosylǵan qanttyń ortasha mólsherin 10%-ǵa tómendetedi.
Kodeks alkogolsiz sýsyndardyń quramyna, tańbalanýyna jáne marketıngine (sonyń ishinde jarnama men naryqta ilgerilýine) qatysty negizgi qaǵıdattar men tásilderge qatysty erikti erejelerdi anyqtaıdy. Kompanııalar tutynýshylarǵa ártúrli ónimder men dámderdiń, sonyń ishinde kalorııasyz optsııalardyń keń aýqymyn usyný úshin sýsyndardyń retseptteri boıynsha jumysty kúsheıtýge kelisti. Óndirýshiler 2026 jyldyń sońyna deıin portfolıosyn shaǵyn oraý formattarymen (0,5 lıtr nemese odan az) tolyqtyrýǵa jáne sýsyndarynyń qaptamasyna tutynýshylarǵa qoljetimdi jáne túsinikti sýsynnyń quramy týraly tolyq jáne senimdi aqparatty ornalastyrýǵa mindettendi.
Alkogolsiz sýsyndar men shyryndar óndirýshileriniń qaýymdastyǵy, sondaı-aq Kodekske qol qoıǵan kompanııalar barlyq basqa alkogolsiz sýsyndar óndirýshilerin Kodekste tujyrymdalǵan mindettemelerdi qabyldaýǵa jáne olardy naryqtyq tájirıbege tez ári tolyqqandy engizýge yqpal etýge shaqyrdy.
«Qazirgi qıyn ekonomıkalyq jaǵdaıda qaýymdastyq músheleri óndirýshiler men halyqqa sýsyndarǵa qosymsha aktsızdik salyq salmaýdy usynady. Azyq-túlik, sýsyndar baǵasy shamamen 70%-y ımporttyq bolyp tabylatyn shıkizat baǵasynyń ósýine, logıstıkalyq tizbekterdiń kúrdelenýine jáne dollar men eýro baǵamynyń ósýine baılanysty kóteriledi. Eger memleket otandyq sýsyndar óndirisin, sondaı-aq jaqyn arada taǵy bir zaýyt salý jáne eldi jergilikti qantpen tolyq qamtamasyz etý josparlanyp otyrǵan qant salasyn qoldaǵysy kelse, onda biz bul máseleni salanyń ózin-ózi retteý jolymen sheshýdi usynamyz. Ulybrıtanııa, Norvegııa sııaqty keıbir eýropalyq elder óz óndirýshilerine qoldaý kórsetý úshin buryn engizilgen alkogolsiz sýsyndarǵa salynatyn salyqtardy alyp tastaı bastady», – dep atap ótti Alkogolsiz sýsyndar men shyryndar óndirýshiler qaýymdastyǵynyń prezıdenti Álııa Mamytbaeva.
Sondaı-aq Álııa Mamytbaeva qantty azaıtý týraly sheshim óndirýshilerge ońaı bolmaıtynyn atap ótti.
Quramynda qant bar sýsyn óndirýshilerdi Almaty qalasy kásipkerler palatasynyń dırektory Aıtýar Qoshmambetov te qoldaıdy.
«Atameken» UKP kúrdeli ekonomıkalyq jaǵdaıdy eskere otyryp, usynylǵan sharalardy qoldamaıdy. Bul jaǵdaıda kompanııalar salanyń ózin-ózi retteýi tıimdi qural bolady, sondyqtan memleket ındýstrııany da estip, Qazaqstanda quramynda qant bar sýsyndarǵa aktsızdik salyq engizbeıdi dep senemiz», – dep atap ótti Aıtýar Qoshmambetov.