Quramynda GMO bar sheteldik ónimder adam ómirine qaýipti - senator Bektaev
ASTANA. QazAqparat - Quramynda GMO bar sheteldik ónimder adam ómirine qaýipti. Bul pikirdi búgin elordada ótip jatqan «Qazaqstan aýyl sharýashylyǵy ǵylymy men óndirisiniń tańdaýy GMO-dan ada ómir» atty «dóńgelek ústel» barysynda QR Parlamenti Senatynyń depýtaty, «Aýyl» partııasynyń tóraǵasy Álı Bektaev bildirdi, dep habarlaıdy QazAqparat.
«Ózderińizge belgili, ekologııalyq taza ónim degenimiz - taza jerde, mıneraldyq tyńaıtqyshsyz, pestıtsıdter men ózge de tehnogendi qospasyz, ne bolmasa taza shıkizattan zamanaýı tehnologııamen óndirilgen, eshbir artyq qospasyz alynǵan ónim. Ekologııalyq taza azyq-túliktiń quramynda gendik modıfıkatsııalanǵan aǵzalar, sıntetıkalyq konservanttar, jasandy dámdeýishter men hosh ıistendirgishter, hımııalyq tyńaıtqyshtar, qurt túsýge qarsy dári-dármekter bolmaıdy, sondyqtan dámi de taza bolady. Organıkalyq negizde ósirilgen ónim - qashanda paıdaly. Kókónis pen jemis-jıdektiń qaýipsiz jáne paıdaly bolýyn Tabıǵat-Ananyń ózi qamtamasyz etip qoıǵandaı. Neǵurlym syrtqy yqpal az bolsa - soǵurlym paıdasy saqtalady», - dedi ol.
Onyń aıtýynsha, quramynda GMO bar taıaý jáne alys shet elderden ákelinetin ónimder adam ómiri úshin qaýipti.
«Quramynda GMO bar ónimder ónim qorabynda GMO-nyń bar ekendigin kórsetýdi mindetteıin zańnyń bolǵandyǵyna qaramastan qazaqstandyq naryqqa erkin enýde. Bul GMO-ny anyqtaýǵa arnalǵan arnaıy zerthanalardyń jetkiliksizdiginen oryn alýda. Al eń basty qaýip azyq-túlikpen qatar GMO-ny qoldaný tehnologııasy - tuqym, tyńaıtysh, hımıkattar túrinde ákelinip jatyr. Al bul jaǵdaıda topyraǵymyzdyń zalaldanatyndyǵy túsinikti jaıt. Bul adam ómirine óte qaýipti», - dedi Álı Bektaev.
Aıta keteıik, GMO-ǵa qatysty eń lıberaldy zań AQSh-ta qoldanylady. Eýroodaq quramyndaǵy elderde GMO komponentteri qosylǵan azyq-túlikterdi óndirýge jáne ımporttaýǵa qatań shekteýler qoıylǵan. Erejege sáıkes, quramyndaǵy GMO-qospasy 0,9 paıyzdan asqan barlyq ónimdi markerleý kerek. 2004 jyly Eýroodaq 4 jasqa deıingi balalardyń taǵamyna GMO qosýǵa tyıym saldy. Frantsııa, Italııa jáne Gretsııa elderinde GMO qospasy bar kez kelgen azyq-túliktiń syrtyna taıǵa tańba basqandaı jazyp qoıý talap etiledi. Jańa Zelandııa men Afrıkanyń kóptegen elderinde GMO-sy bar ónimderge moratorıı jarııalanǵan. Qytaı men Úndistanda da GMO azyq-túligin qoldanýǵa belgili shekteýler bar.
