Quramynan qorǵasyn tabylǵan Maggi kespesiniń qory joıylmaq
ASTANA. QazAqparat - Nestle kompanııasy Úndistan bıliginiń Maggi kespesiniń satylýyna salǵan tyıymynan soń quny $50 mln. astam turatyn atalǵan taǵam qoryn joımaq, dep habarlaıdy Bı-bı-sı.
Aıta keteıik, úndi bıligi budan buryn elde kóp tutynylatyn atalǵan makaron ónimderin densaýlyqqa zııan dep tanyp, Nestle kompanııasyn azyq-túlik qaýipsizdigin saqtamaǵany úshin aıyptaǵan bolatyn. Kompanııa bul tyıymǵa qatysty máseleni Mýmbaıdyń joǵarǵy sotynda daýlap jatyr. Buǵan deıin Úndistannyń birneshe shtatynda Maggi ónimderiniń quramynan mólsherden tys qorǵasyn tabylǵany týraly jarııa etilgen soń kompanııa óz ónimderin dúken sórelerinen ala bastaǵan. Sondaı-aq ónim quramynan onyń qaptamasynda kórsetilmegen natrıı glýtamaty anyqtalǵan. Nestle basshysy Pol Bal zerthanalyq testilerdi muqııat zerdelep, óz ónimderin dúken sórelerine qaıta qaıtarýǵa nıetti. Jyldam daıyndalatyn bul kespe ónimi Úndistan naryǵynyń 80%-yn jaýlap alǵan.
