Quramynda qanty bar sýsyndarǵa aktsızdi ósirý jyl sońyna deıin sheshiledi

ASTANA. KAZINFORM – Quramynda qanty kóp sýsyndarǵa aktsız qunyn kóterý máselesine qatysty sheshim jyl sońyna deıin qabyldanýy múmkin. Atalǵan jańashyldyqqa qatysty Ulttyq ekonomıka mınıstri Nurlan Baıbazarov pikir bildirdi. 

«Jaqynda Salyq kodeksin ázirleý aıasynda jınalys ótti, atalǵan máseleni Densaýlyq saqtaý mınıstrligimen egjeı-tegjeıli talqyladyq. Mınıstrliktiń málimetinshe, quramynda qant kóp energetıkalyq jáne gazdalǵan sýsyndar qoǵamda alańdatýshylyq týǵyzyp otyr. Sonymen qosa vedomstvonyń málimetinshe, elimizde qant dıabetimen aýyratyn naýqastardyń sany kúrt ósýde», - dedi Nurlan Baıbazarov Úkimet otyrysynan keıin ótken baspasóz máslıhatynda.

Mıınstrdiń pikirinshe, qantty kóp mólsherde tutyný aıtarlyqtaı problema. 

«Iá, másele ózekti, biraq, kez-kelgen fıskaldyq ınnovatsııa ony egjeı-tegjeıli qarastyrýdy qajet etedi. Álbette, Densaýlyq saqtaý mınıstrligi tarapynan bir bankten aktsız alǵysy keletin somalar, sandar aıtyldy. Biz bul taqyryptardy áli de talqylaımyz, qarastyramyz, onyń ekonomıkaǵa qalaı áser etetinin qarastyramyz. Máseleni ekinshi jaǵynan alyp qarasaq, qanty kóp túrli sýsyndardy óndirýshiler bar, shynymdy aıtsam, bıznes bul aktsızdi tólegisi kelmeıdi. Meniń oıymsha, qant aktsızine qatysty suraqqa bıyl jaýap berýimiz kerek», - deıdi ol.