Quramynda hımııalyq zattar kóp: Coca-Cola Eýropadaǵy ónimderin keri qaıtarady

ASTANA. KAZINFORM – Coca-Cola Eýropanyń keıbir elderindegi sýsyndaryn keri qaıtaryp alatynyn málimdedi. Olardyń quramynda hlorat hımııalyq zatynyń kóp ekeni anyqtaldy, dep habarlaıdy VVS. 

Kompanııa óz ónimderin Belgııa, Lıýksembýrg jáne Nıderlandtaǵy sórelerden qaıtaryp alatynyn habarlady. Naqtylanǵandaı, bul toptamanyń bes ataýy ótken jyldyń sońynda Ulybrıtanııaǵa jetkizilgen jáne olardyń barlyǵy satylyp ketken.

Hlorat hlor negizindegi dezınfektsııalyq zattardy sýdy tazartýda jáne tamaq ónerkásibinde qoldanǵanda túzilýi múmkin.

- Táýelsiz saraptamalyq taldaý tutynýshylar úshin táýekeldiń óte az ekenin kórsetti, - dep atap ótti kompanııa ókili.

Coca-Cola-nyń habarlaýynsha, kompanııa Ulybrıtanııa tutynýshylarynan eshqandaı shaǵym almaǵan jáne el bıligimen bul másele boıynsha yntymaqtastyǵyn jalǵastyrady.

Hlorattyń joǵary deńgeıiniń áseri densaýlyqqa keri áser etýi jáne ásirese balalar men sábılerde qalqansha bezi problemalaryna ákelýi múmkin.

Ulttyq densaýlyq saqtaý qyzmetiniń (NHS) dıetology Karon Grazett sońǵy zertteýlerge silteme jasaı otyryp hlorat mólsheri joǵary taǵamdardy paıdalaný júrek aınýy, qusý, dıareıaǵa ákelip, qannyń ottegin sińirý qabiletin tómendetýi múmkin ekenin baıandady.

Osyǵan deıin Carlsberg Qazaqstanda alkogolsiz sýsyndar shyǵaratyn jańa jobany júzege asyrǵaly otyrǵanyn jazdyq.