Qurama jem baǵasyn arzandatýǵa bıyl bıýdjetten 30 mlrd teńge bólindi - AShM
ASTANA. QazAqparat - Bıyl elimizdegi qus jáne mal sharýashylyqtary úshin qurama jem baǵasyn arzandatýǵa bıýdjetten 30 mlrd teńge bólindi. Búgin Májiliste qurama jem ónerkásibisin jańǵyrtý taqyrybyna arnalǵan dóńgelek ústel barysynda Aýyl sharýashylyǵy vıtse-mınıstri Saparhan Omarov osylaı málimdedi.
Vıtse-mınıstrdiń aıtýynsha, elimizde 2006 jyldan bastap mal sharýashylyǵyndaǵy iri jáne orta óndiris uıymdaryn yntalandyrý, sonyń ishinde qurama jemniń qunyn arzandatý úshin ishinara sýbsıdııalaý baǵdarlamasy júzege asyrylýda.
«Mal jáne qus sharýashylyǵynyń ózindik quny qurylymynda 40-tan 80 paıyzǵa deıingi shyǵyndar negizinen olardyń azyǵyna ketedi. Sondyqtan da, qurama jem óndiretin kásiporyndardy qoldaý úshin mınıstrlik tarapynan qurama jemdi sýbsıdııalaý júzege asyrylýda. Osyǵan oraı, jyl saıyn jemdi arzandatý maqsatyna bólinetin bıýdjettik qarajat kólemi de artyp otyr. Bıyl bul baǵytta bıýdjetten 30 mlrd teńgeden astam qarajat bólindi. Bul 2010 jylǵa qaraǵanda eki esege artyq kórsetkish», - dedi Saparhan Omarov.
Onyń aıtýnysha, búgingi kúni respýblıka aýmaǵynda qurama jem óndiretin 69 kásiporyn jumis isteýde. Atalǵan kásiporyndardyń qurama jem óndirý boıynsha qýattylyǵy jylyna 1,9 mln. tonnany quraıdy. Bul rette qurama jem zaýyttarynyń júktelimi 45 paıyzǵa teń. Aıta keterligi, sońǵy ýaqytta qurama jem zaýyttaryn qoldaý máselesi jandanyp keledi. Máselen, 2006 jyldan 2014 jylǵa deıin «QazAgroQarjy» AQ tarapynan qurama jem qaýyttary úshin qural-jadyq satyp alý boıynsha jalpy quny 1 mlrd 904,5 mln. teńgeni quraıtyn 20 joba qarjylandyrylǵan.
