Qupııa qyzmet: Ardager barlaýshy qyzmet barysyndaǵy estelikterimen bólisti

ASTANA. KAZINFORM – Búgin – Ulttyq qaýipsizdik komıteti qyzmetkerleriniń kúni. El tynyshtyǵyn qorǵaý jolynda kózge kórinbeı, tasada júrip qyzmet etkenderdiń biri – general-maıor Adamǵalı Nákisbekov.

Ol 36 jyl boıy barlaý jáne qarsy barlaý salasynda eńbek etken. Máskeýde bilim alyp, Germanııada áskerı boryshyn ótegen.

– Ákem – soǵys ardageri. Sheshem de qarapaıym eńbek adamy boldy. Jeti aǵaıyndymyz. Ózim ınjener bolsam dep armandadym. Aýylda orta mektepti bitirip, polıtehnıkalyq ınstıtýtqa qujat tapsyrdym, biraq óte almadym. Keıin áskerge shaqyryldym, - dep eske alady general.

Áskerden kelgen soń Almatyda kólik jóndeý zaýytynda jumys istegen. Sol kezde zaýyttaǵy, ınstıtýttaǵy jastardyń tártibi men bilimin baqylap júrgen qaýipsizdik organdary qyzmetkerleriniń kózine túsipti. 

– Bir kúni kadr bóliminiń basshysy shaqyryp: «Biz seni Máskeýge oqýǵa jibergimiz keledi. Biraq aldymen emtıhan tapsyrý qajet», – dedi. Jezdemmen aqyldasyp, synaq tapsyrdym. 1975 jyly arnaıy joǵary mektepke qabyldandym. Osylaısha barlaý salasyndaǵy jolym bastaldy, - deıdi Adamǵalı Nákisbekov.

Ol Máskeýde bes jyl bilim alǵannan keıin elge oralyp, 36 jyl boıy jedel qyzmette, onyń ishinde qarsy barlaýda eńbek etipti.

– Bizdiń mindet – shetelden kelgen azamattardyń arasynan tyńshylardy anyqtap, ustaý jáne tergeý. Biraq bul jumys óte qupııa. Ne úıde, ne dostar arasynda ózińniń nemen aınalysyp júrgenińdi ashyq aıtýǵa bolmaıdy, - deıdi UQK qyzmetiniń ardageri.

Generaldyń sózinshe, eń qıyn sát – arnaıy operatsııanyń aldyndaǵy tún.

– Operatsııadan 1 kún buryn uıyqtaı almaı, barlyq qadamdy oılanyp shyǵasyń. 1998 jyly bir Azııa eliniń tyńshylaryn ustaý operatsııasy boldy. Túni boıy jospar jasadyq. Tańerteń kelsek, basshylyq jospardy ózgertip tastapty. Al operatsııanyń bastalýyna bir saǵat qana qalǵan. Sol qysqa ýaqytta áreket baǵytyn ózgertip, arnaıy jasaqqa belgi berdik. Olar tyńshylardy sátti ustady. Sol kezde agentimizdiń syrt kıimi jyrtylyp qalyp, keıin oǵan jańasyn alyp berdik, - deıdi ol.

Adamǵalı Nákisbekov qazirgi jastarǵa beriletin múmkindiktiń moldyǵyn erekshe atap ótti.

– Búginde bilim alý da, shetelge shyǵý da jeńildedi. Biraq qaı salada bolsyn eń bastysy – jaqsy maman bolý. Ol úshin tereń bilim qajet. Teorııa men praktıka bólek bolǵanymen, akademııalyq bilim – eshkim tartyp ala almaıtyn basty baılyǵyń. Al qandaı tapsyrma berilse de, ony adal oryndaý – paryz, - dep keńes beredi ardager.

Generaldyń aıtýynsha, buryn bul salaǵa medıtsına nemese sport salasyndaǵy mamandar alynbaǵan. Al qazir zańger, tarıhshy, saıasatker, ınjener, tipti jýrnalıster de qyzmet ete alady. 

– Barlaýshylar shetelge shyqqanda, qaýipsizdik komıtetiniń qyzmetkeri ekenin aıtpaıdy. Olar ózin saıasatker, zertteýshi, kásipker nemese jýrnalıst retinde tanystyrady. Qazir barlaý salasy túrli baǵyttaǵy mamandardy qajet etedi, - dep túıindedi general.

Aıta keteıik, jýyrda ǵana áskerge shaqyrylǵandardyń densaýlyǵyna qoıylatyn talaptar jańartyldy.